Ambasadorja Amerikane Yuri Kim është shprehur se hetuesit amerikanë janë pranë SPAK dhe BKH për të ofruar asistencë.
Gjatë një interviste në emisionin “Opinion”, ajo shprehu edhe një herë mbështetjen e SHBA ndaj institucioneve të dala nga reforma në drejtësi.
“Kemi ofruar mbështetje shumë të forte në formën e asistencës teknike, këshillave eksperte, trajnimit, si dhe asistencës materiale, për shembull kompjutera, duke u siguruar që të kenë pajisjet që iu duhen për të bërë punën. Ne i vendosim paratë aty ku themi. Nuk themi thjesht që mbështesim SPAK dhe BKH apo prokurorinë e posaçme, por kemi vënë edhe investimin për ta treguar mbështetjen tonë.
Ata janë aty për të ofruar asistencë teknike dhe këshilla eksperte. Kam një ish-agjent të FBI-së që është pjesë e personelit në ambasadë që ofron një pjesë të kësaj asistence. Por të jeni të sigurt, jemi aty për të mbështetur në maksimumin e mundshëm.”, u shpreh Kim.
Ndër të tjera, Kim theksoi se ata që nuk e duan reformën në drejtësi paraqesin rrezikshmëri të lartë.
Kujtojmë se BKH mbylli fazën e dytë për rekrutimin e 60 hetuesve që kanë shfaqur interes për t’u bërë pjesë e saj rreth 1 javë më parë.
Pa.Va/Fjala.al
