Kryetari i Bashkisë Tiranë, Erion Veliaj komentoi të enjten thirrjet e Kryemadhit në Kombinat që u kërkoi qytetarëve të jetojnë në banesat e dëmtuara nga tërmeti, duke i quajtur ato kriminale.
Veliaj siguroi banorët e Kombinatit se do të marrin çdo dëmshpërblim deri ditën që do të hyjnë në apartament të ri.
“Kur shihja dje, po politizoheshin edhe shtëpitë në Kombinat. Se si mund të ketë politikanë, ose politikane, që janë aq të papërgjegjshëm sa u thonë njerëzve ju s’keni për të ikur nga shtëpitë tuaja, kur inxhinieri ka firmosur që janë të pabanueshme. Jetojmë në Tiranë, çdo gjë bën vaki, por për sa kohë u shpjegojmë njerëzve që deri ditën që marrin çelësin e apartamentit të ri nuk lëvizin nga lista e bonusit dhe do vazhdojnë të rrinë në një shtëpi me qira të padëmtuar.
Sigurisht, kur afron fushata, fillon dhe dalldia kolektive e politikanëve që sa kishin gjë në dorë s’bënë dot, ama kur vjen fushata mundohen të provokojnë në çdo sentiment njerëzor. Me njerëzit duhet të flasësh me qetësi. Bonusi i qirasë vazhdon derisa të marrësh apartamentin e ri, por mos e thëntë zoti të inkurajojmë njerëz të rrinë në shtëpi të dëmtuara, të cilat inxhinierët i kanë certifikuar si shtëpi jashtë përdorimit. T’u thuash njerëzve rrini në një pallat që mund të shembet, që unë të kap dy titra nëpër lajmet e ditës, është komplet e papërgjegjshme”, u shpreh Veliaj.
Kujtojmë se të mërkurën Kryemadhi bëri një takim në kombinat ku u zotua para banorëve se nuk do lejojë që tu tjetërsohet prona.
Pa.Va/Fjala.al
