Kryetari i grupit parlamentar të PS-së, Taulant Balla të premten deklaroi se dekreti i presidentit Ilir Meta, për të kthyer Kodin e ri Zgjedhor në Kuvend, do të rrëzohet.
Nga Elbasani, Balla tha se i vjen keq që Presidenti i Republikës mori kohën për të vonuar procedurat parlamentare, duke u shprehur se mazhoranca nuk ka më asnjë ditë kohë për të humbur.
“Kodi Zgjedhor është një kod i plotë i cili ka transferuar qasjen dhe i ka dhënë një fuqi më të madhe popullit të zgjedhë jo vetëm kryetarin dhe partinë politike që do, por të zgjedhe edhe listën e kandidatëve që do. Çdo vonesë që vjen nga një president mistrec dhe hileqar unë mendoj që i kemi të gjitha mundësitë ta kalojmë.Reforma zgjedhore është sukses. Tani qytetarët nuk do të kenë një votë, por dy vota meqë këtë e donte dhe presidenti”, tha Balla.
Balla ka një përgjigje edhe për akuzat lidhur me inceneratorët e Elbasanit.
“Në Elbasan përgjigjen e japin banorët. Të gjithë e mbajnë mend fushën e plehrave në Elbasan kryesorja për sëmundje kanceroze. Nëse dikur Elbasani mbulohej nga tymi i plehrave sot situata është krejt e kundërt. Lulzim Basha i premtoi Elbasanit se do ta zgjidhte problemin e ndotjes në 2009 dhe asgjë nuk bëri”, tha ai.
I pyetur për fillimin e hetimeve nga SPAK, Balla tha se drejtësia duhet të bëjë detyrën e saj të pavarur.
Presidenti i Republikës, Ilir Meta të premten ka rikthyer në Kuvend për rishqyrtim ligjin për ndryshimet në Kodin Zgjedhor.
Meta e kishte paralajmëruar edhe më herët se këtë ligj do e rikthente në Kuvend, duke i lënë kohë mazhorancës për reflektim.
Presidenti thekson se kodi i ri që u miratua në Kuvend shkeli marrëveshjen e arritur më 5 qershor në Këshillin Politik.
Meta argumenton se nëse Kuvendi i Shqipërisë nuk reflekton për rishikimin e këtij ligji pas kthimit të tij nga Presidenti i Republikës, atëherë ai do ta dërgojë në Gjykatës Kushtetuese./Re.D/Fjala.al
