Rritja e rasteve pozitive me Covid-19 dhe mungesa e stafit mjekësor ka detyruar Belgjikën të marrë disa masa jo të pëlqyeshme.
Stafi mjekësor në qytetin belg të Liege, janë detyruar të vazhdojnë shërbimin e tyre, ndonëse rezultojnë pozitiv me COVID.
Në rreth 10 qendra spitalore ku personeli ka kryer testimet, ka pasur një numër të konsiderueshëm të infektuarish nga anëtarë të stafit mjekësor, por që janë asimptomatikë.
Pavarësisht këtij fakti, i gjithë stafi është në krye të detyrës.
Kreu i Shoqatës së Sindikatave Mjekësore në Belgjikë është shprehur se nëse stafi do të vendoste për të ndaluar punën, do mjaftonin vetëm pak ditë që i gjithë sistemi spitalor të shembej.
Megjithatë, kjo situatë mbetet e papëlqyeshme, për shkak se rreziku i transmetimit të virusit tek pacientët e shtruar në spital është shumë i lartë.
Aktualisht një në tre persona të testuar rezultojnë pozitiv me Covid-19.
Spitalet po transferojnë pacientët në ambiente të tjera dhe po anulojnë ndërhyrjet kirurgjikale jo emergjente.
Ministri i Shëndetësisë, Frank Vandenbroucke paralajmëroi se vendi ishte afër një “cunami” infeksionesh dhe ku autoritetet nuk mund të kontrollojnë më atë që po ndodh./Re.D/Fjala.al
