Spikat Abazaj dhe Rroca në Turqi, Vrioni aktivizohet për Juventusit, gola në Azerbajxhan dhe Kinë. Ka qenë një fundjavë përgjithësisht pozitive kjo e fundit për futbollistët shqiptarë që militojnë nëpër kampionatet e vendeve të ndryshme evropiane. Natyrisht, për t’u vlerësuar ishte aktivizimi, edhe pse për vetëm 7 minuta në sulm i Xhakomo Vrionit në barazimin 1-1 të Juventusit me Veronën të dielën në mbrëmje. Fakti që trajneri Andrea Pirlo, jo vetëm nuk e ka huazuar në një tjetër klub, por gjen edhe hapësirë për ta aktivizuar, flet mjaft për futbollistin e Kombëtares kuqezi.
Duke mbetur në Itali, Elseid Hysaj dhe Thomas Stakosha ishin pushim përkatësisht për Napolin dhe Lacion, ndërsa, ndonëse Atalanta u mposht 3-1 nga Sampdoria, Gjimshiti tregoi paraqitje pozitive në fushë. Në Serinë B, Etrit Berisha ishte titullar në portë për SPAL-in, që mundi në fund Viçencën 3-2, Dermaku u zëvendësua në minutën e 9-të të barazimit 1-1 të Leçes me Kozencën, kurse Memushaj ishte titullar në humbjen 0-2 të Peskarës në shtëpi me Frosinonen. Ndërkaq, Armando Sadiku ka zbritur për herë të parë në fushë këtë sezon me skuadrën turke, Erzurumspor.
Por ai është mundur 1-2 në shtëpi përballë Gallatasajit, ku aktivizua për disa minuta në fund. Ndërkaq, ishte dita e Kristal Abazajt dhe Eduart Rrocës për shkëlqyer në Turqi, teksa ishin protagonistë në fitoren 3-0 që Istanbulspori arriti në fushën e vet ndaj Eskisehirsporit, Abazaj shënoi golin e parë për kryeqytetasit, në takimin e vlefshëm për javën e 7-të të nivelit të dytë të kampionatit turk të futbollit, ndërsa ish-mesfushori i Kukësit dha pasimin për golin e dytë dhe fitoi 11-metërshin e golit të 3-të, teksa ishte një nga më të mirët në fushë për skuadrën e tij.
Në Gjermani, Klaus Gjasula ishte nismëtari i golit që vulosi fitoren 3-1 të Hamburgut ndaj Vurzburgut, fitore kjo e 5-ta radhazi për futbollistin kuqezi. Edhe ish-kapiteni Mërgim Mavraj vazhdon të tregoj formë të mirë me skuadrën e Grojther-Fyrthit, ku edhe në fundjavën që lamë pas ishte një pikë kyçe në mbrojtje. Ndërkaq, duke u zhvendosur më në lindje të Evropës, ish-mesfushori i Tiranës dhe Bylisit gjeti golin e parë në Azerbajxhan, duke shënuar në barazimin 1-1 të Gabalasë përballë Sabailit.
Kurse në Lindjen e Largët, në Kinë, Jahmir Hyka ka gjetur golin e tij të parë me Guizhu Hengfenun, në fitoren 3-0 të skuadrës së tij në nivelin e dytë të kampionatit të futbollit atje. Ndërkaq, Armando Broja bëri një paraqitje mjaft të mirë fitoren 2-1 që Vitese arriti ndaj PSV-së së Eind’hovenit.
la.mi/Fjala.al
