Kryeministri Edi Rama ka takuar ditën e hënë katër fëmijët e shpëtuar nga kampi Al-Hol në Liban, ku ka deklaruar se nesër do të kthehen në Tiranë.
Rama u shpreh se ndihet shumë i lehtësuar dhe se nesër paradite do të rikthehen në Shqipëri.
“Jam i lehtësuar sepse siç thashë ishte një operacion i komplikuar edhe më vjen jashtëzakonisht mirë. Kam kontaktur me gjeneralin që ka bërë operacionin. Dua të veçoj meritën e jashtëzakonshme të të dërguarit të posaçëm të ministrisë, drejtorit të antiterrorit dhe punonjësit tjetër të policisë që kanë operuar në këtë teritor. Në mënyrë të veçantë një mik tonin, konsullin e nderit në Liban që na ka ndihmuar për të bërë të gjitha lidhjet jo aq të lexueshme me të gjithë faktorët. Jam shumë i kënaqur që nesër paradite do të kthehemi në Tiranë.
Me ne është dhe drejtoresha e shërbimeve speciale. Kemi ngritur të gjithë rrjetin e nevojshëm për t’i trajtuar me maksimumin e kujdesit. Nëna e fëmijëve është në gjendje të vështirë shëndetësore pasi ka një plagë në trup por edhe ajo do të vijë me ne. Ky operacion i hap rrugën një operacioni tjetër. Endri do të kthehet, dje dhe gjatë këtyre ditëve nuk ka qenë e mundur që të kontaktohet Eva. Është mirë por janë pak të komplikuara informacionet”, tha Rama.
Al-Holi është njëri prej kampeve të ngritura në fusha të hapura për të mbajtur nën kontroll ekstremistët. Ai u ngrit si një oaz shpëtimi e shprese për të strehuar të gjitha gratë dhe fëmijët të penduara nga bashkimi me ISIS-in.
Pa.Va/Fjala.al
