Zyrtarët e lartë të Bashkimit Europian kanë kërkuar që mazhoranca në Shqipëri të presë fillimisht opinionin e Komsionit të Venecias përpara se të rivotojë në Parlament ndryshimet në Kodin Zgjedhor.
Komisioneri për Zgjerimin Oliver Varhelyi ishte ndër të parët që e kërkoi këtë gjë.
“Unë besoj se Komisioni i Venecias do të ofrojë ndihmë të menjëhershme mbi zbatimin e ndryshimeve kushtetuese të 30 korrikut. Parlamenti duhet të marrë në konsideratë pritjen pa rivotuar për të marrë këtë mendim në shqyrtim. Mezi pres zgjedhje të lira dhe të ndershme në prill 2021”, shkroi ai në Twitter.
Në të njëjtën linjë është edhe Eurodeputeti për Shqipërinë në PE, David Lega, që adresoi një kërkesë të drejtpërdrejtë për Kryeministrin Rama.
“Pajtohem me Komisionerin Oliver Varhelyi.”, u shpreh ai.
Parlamenti dhe Kryeministri Rama duhet të presin për opinionin e Komisionit të Venecias, që do të ishte qasje demokratike. Zgjedhje të lira dhe të drejta në prill 2021 Shqipëri”, shtoi Lega.
Më vonë, Zëvendës Presidenti i PPE-së në Parlamentin Europian, Andrei Kovaçev, tha se Kodi Zgjedhor duhet të jetë në përputhje me rekomandimet e “Venecias”.
“Mbështes qëndrimin e Komisionerit Oliver Varhelyi! Kodi Zgjedhor duhet të jetë, në çdo rast, në përputhje me Opinionin e Komisionit të Venecias, pasi do të ishte në favor të demokracisë në Shqipëri. Unë i bëj thirrje Kryeministrit Rama dhe Kuvendit të Shqipërisë që ta respektojnë këtë”, u shpreh Kovaçev.
Presidenti Ilir Meta ishte ai që iu drejtua Komisionit të Venecias për të dhënë një opinion mbi këtë çështje. Ndërkohë, nga ana tjetër Kryeministri Rama duket i vendosur për të votuar ndryshimet në Kod përpara opinionit të Venecias.
Pa.Va/Fjala.al
