Policia e Shtetit njoftoi të hënën se ka gjobitur 664 qytetarë, të cilët nuk mbanin maska.
Sipas uniformave blu, 121 prej tyre kanë qenë pasagjerë në mjete të ndryshme, të cilët sërish nuk mbanin maskë, ndërsa nëntë persona janë arrestuar, pasi nuk kanë pranuar të identifikohen për të mos u gjobitur.
“Gjithashtu, nga ana e shërbimeve të Policisë Rrugore në të gjithë vendin janë konstatuar dhe ndëshkuar me masë administrative 3.000 lekë, 121 pasagjerë që janë konstatuar pa maska në automjete private (pa lidhje familjare me drejtuesin e mjetit) dhe pasagjerë pa maska mbrojtëse në mjetet e transportit publik.
Gjithashtu, gjatë kontrolleve janë shoqëruar në ambientet e Policisë në të gjithë vendin, 9 shtetas që nuk kanë pranuar t’i tregojnë punonjësve të Policisë dokumentin e identifikimit apo nuk e kanë pasur atë me vete, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.”, thuhet ndër të tjera në njoftimin e policisë.
Një ditë më parë, uniformat blu kanë gjobitur 688 qytetarë që nuk respektonin protokollet anti-covid.
Pa.Va/Fjala.al
