Italianët të zemëruar, mijëra në protestë kundër masave
Me mijëra italianë kanë dalë në sheshet e Milanos, Napolit, Palermos, Torinos dhe Romës. Nuk ndalet zemërimi i pronarëve të restoranteve, palestrave dhe tregtarëve që janë të penalizuar nga kufizimet e reja të qeverisë italiane kundër koronavirusit.
Plani i ri i masave kufizuese anti-COVID-19, përfshin mes të tjerash mbylljen nga ora 18:00 të të gjitha restoranteve, bareve dhe ëmbëltoreve. Kinematë, teatrot, sallat e gjimnastikës dhe pishinat do të duhet të mbyllen.
Ministria e Brendshme e Italisë është vënë në alarm, pasi vendi rrezikon tension social.
Në manifestimet e ditëve të kaluara në Napoli, Romë dhe Torino, sipas mediave italiane, me policinë nuk u përplasen kategoritë më të prekura nga kriza e muajve të fundit, por kategoritë që po kërkojnë qëllimisht trazira sociale: ultrasit, ekstremistët e të së djathtës, pjesëtarë të krimit të organizuar, etj.
Por situata tani mund të ndryshojë.
Zemërimi i kategorive të prekura nga masat e reja që përfshijnë kategori të ndryshme sociale mund t’u krijojë mundësinë grupeve që janë të interesuara për të krijuar tension dhe trazira./Re.D/Fjala.al
