Presidenti i Republikës së Shqipërisë, Ilir Meta ka falenderuar kryetarin e Komisionit të Jashtëm në Parlamentin Europian, David McAllister, për reagimin e tij ndaj maxhorancës së vendit, e cila është shprehur së fundmi se nuk ka kohë për të pritur, teksa nesër do të votohen në Kuvend ndryshimet kushtetuese në Kodin Zgjedhor.
McAllister u shpreh i shqetësuar për këtë ngutje të qeverisë shqiptare, teksa u shpreh se kjo mund të shkaktojë krizë politike para dhe pas zgjedhjeve të 25 prillit.
Duke falenderuar McAllister, të cilin ai e konsideron një mik të çmuar të Shqipërisë, kreu i shtetit bën thirrje për reflektim, pasi sipas tij ka ende kohë.
Kujtojmë se më herët Meta ktheu në Kuvend ndryshimet për Kodin Zgjedhor duke argumentuar se deputetet aktualë janë ilegjitimë dhe s’kanë të drejtë të bëjnë ndryshime kushtetuese. Me kërkesën e kreut të PD-së, Meta dy ditë më parë e ka dërguar Kodin Zgjedhor për opinion në Komisionin e Venecias.
Ndërsa sot Meta i drejtohet me një kërkesë Kuvendit të Shqipërisë të marrë për bazë opinionin e Komisionit të Venecias. Ndërkohë që kryeministri Edi Rama paralajmëroi se Kodi do të miratohet sërish nga mazhoranca pa asnjë ndryshim.
la.mi/Fjala.al
