Ilir Meta dhe Edi Rama janë përfshirë sot në një tjetër debat, pasi kreu i shtetit iu drejtua ministrisë së Shëndetësisë dhe kryeministrit me një letër, ku kërkonte informacion mbi masat e marra për COVID-19, pas shpërthimit të rasteve.
Pas letrës, reagoi menjëherë Edi Rama, i cili tha se presidenti nuk ka asnjë kompetencë për të futur hundët në punët e ekspertëve.
Kjo solli edhe reagimin e presidencës, sipas të cilës, kreu i shtetit ka të drejtë të kërkojë informacion. Zëdhënësi i presidentit, citon dy nene të kushtetutës.
“NENI 23, PIKA 2
“Kushdo ka të drejtë, në përputhje me ligjin, të marrë informacion për veprimtarinë e organeve shtetërore, si dhe të personave që ushtrojnë funksione shtetërore”
NENI 93, GËRMA “H”
Presidenti ushtron edhe këto kompetenca:
h) kërkon mendim dhe të dhëna me shkrim nga drejtuesit e institucioneve shtetërore për çështje që kanë të bëjnë me detyrat e tyre”, shkruan Blushi.
Më tej ai vijon duke sqaruar se Kryeministri ende në detyrë, “së pari bën mirë të lexojë me kujdes të vetmen Kushtetutë që ekziston në Republikën e Shqipërisë.
Së dyti i kujtojmë se është dekretuar për të qenë edhe ministër për Europën dhe Punët e Jashtme, dhe jo ministër i Shëndetësisë dhe Mbrojtjes Sociale”.
Sipas tij, Presidenti Meta ka bërë gjithçka, brenda kompetencave që i jep Kushtetuta dhe ligji, për të parandaluar përhapjen e pandemisë COVID-19 dhe i kujtojmë Kryeministrit ende në detyrë se edhe ai vetë e ka falenderuar publikisht për këtë.
“Presidenti Meta pret me shumë durim përgjigje për të gjitha pyetjet e adresuara sot ministres së Shëndetësisë dhe Mbrojtjes Sociale.
Sikundër është në pritje, në vijim edhe të komunikimit të drejtpërdrejtë që ka patur me znj.Manastirliu, për të sjellë propozime për vlerësimin e figurave të shquara të mjekëve e infermierëve me kontribut të vyer në luftën kundër COVID-19”, përfundon Blushi./Bl.Ba/Fjala.al
