Mjeku i njohur imunolog, Genc Sulçebe, u shpreh se që të kemi një ngadalësim të përparimit të infeksionit, duhet që të paktën 40% e popullatës të jetë e imunizuar.
I ftuar në emisionin “Kjo Javë”, teksa foli për situatën e koronavirusit në vend, ai tha se shkuarja drejt një mbyllje tjetër kombëtare, është një vendim i vështirë për t’u marrë.
Sipas mjekut, aktualisht, kemi afërsisht jo më tepër se 20% të popullatës tonë që mund të jetë e imunizuar, pra e ka kaluar infeksionin.
“Sigurisht ky është një vendim i vështirë për t’u marrë. Duhen marrë parasysh shumë tregues. Ka tregues epidemiologjik të caktuar dhe të saktë se si dhe kur duhet realizuar mbyllja. Por kemi parasysh një fakt, ne jemi në një gjendje imunitare të situatës, kur kemi afërsisht jo më tepër se 20% të popullatës tonë, të paktën në Tiranë që mund të jetë e imunizuar, e ka kaluar infeksionin.
Por që të kemi një ngadalësim të përparimit të infeksionit, dhe infeksioni të jetë sporadik, siç është një grip i zakonshëm, pra endemik dhe jo epidemik, duhet që të kemi një numër prej të paktën 50%, diku thonë edhe 40% është e mjaftueshme. Nga kjo situatë ku jemi ne, edhe në 40% po të shkojmë është një interval shumë i gjerë popullate që duhet të preket, në mënyrë që të ngadalësohet. Pra, po ta lesh të lirë përhapjen e virusit, mund të kemi një progresim të vazhdueshëm të përhapjes së infeksionit, siç e kemi ne tani. Pra, një njeri i infektuar, infekton brenda kohës që është infektues, të paktën tre, ato të tre infektojnë nga të tjerë secili dhe kemi një përshpejtim progresim të përhapjes.” u shpreh Sulçebe.
Kujtojmë se ditën e shtunë në vendin tonë janë shënuar 7 viktima dhe 241 raste të reja.
Pa.Va/Fjala.al
