Aksident i rëndë rrugor me pasojë një të ri shqiptar është regjistruar të shtunën në mbrëmje në Itali.
Ngjarja ka ndodhur rreth orës 20:00 në qytetin e Firenzes, ku 28- vjeçari shqiptar udhëtonte me motor tip scooter teksa është përplasur me një makinë gjatë kohës që po kthehej nga puna për në shtëpi.
28- vjeçari ishte rezident në Prato, ku jetonte prej kohësh. Janë ende të paqarta rrethanat se si u përplas me makinën. Përplasja ishte aq e fortë sa i riu përfundoi disa metra larg, duke gjetur vdekjen në vendin e ngjarjes.
Shqiptari, identiteti i të cilit nuk bëhet i ditur në mediat e vendit fqinj, ishte i martuar dhe kishte një vajzë të vogël.
Bashkëshortja dhe nëna e tij mësohet se shkuan në vendin e ngjarjes, pasi u njoftuan për aksidentin tragjik.
Ato u përballën me skenën e tmerrshme dhe u dërguan në spital për shkak të tronditjes. Për aksidentin e rëndë autoritetet policore kanë nisur hetimet për të zbardhur rrethanat e plota të ngjarjes./Bl.Ba/Fjala.al
