Data 2 nëntor duhet që t’i gjente studentët në auditore për të filluar vitin e ri akademik, por për shkak se mësimi ka filluar online prej situatës së pandemisë ata kanë dalë në protestë para Ministrisë së Arsimit.
Lidhur me këtë vendim një grup studentësh kanë dalë në protestë para Ministrisë së Arsimit dhe bëjnë thirrje “jo mësim online”.
Studentët pretendojnë se jo të gjithë kanë mundësi të sigurojnë pajisje teknologjike për zhvillimin e mësimit online dhe kërkojnë kthim në auditore, të paktën për seminaret. Në mbështetje të tyre i janë bashkuar protestës edhe disa pedagogë.
Policia ndërkohë i bën thirrje për tu shpërndarë pasi sipas masave të marra për shkak të pandemisë, grumbullimet nuk lejohen. “Policia do të zbatojë ligjin”, bëjnë thirrje blutë e kryeqytetit me megafon.
Mes studentëve dhe policisë nuk munguan as tensionet, teksa protestuesit vendosën më pas të bllokojnë rrugën.
Në total janë 130 mijë studentë në të gjitha ciklet që fillojnë sot mësimin online në universitetet publike dhe private, kurse 21 mijë prej tyre nisin fakultetin për herë të parë./Bl.Ba/Fjala.al
