Luhet java e 10-të, skuadra nga Suhareka shpartallon Besën e Pejës, tani +6 në krye. Niveli më i lartë i Kampionatit të Futbollit të Kosovës, Superliga, ka luajtur në fundjavë ndeshjet e javës së tij të 10-të dhe Ballkani e ka thelluar edhe më tepër epërsinë në krye të renditjes, tanimë në kuotën e 25 pikëve, 6 më tepër sesa ndjekësja më e afërt, Drita, dhe 8 më tepër sesa Gjilani i vendit të 3-të, ndërsa skuadrat e tjera kanë mbetur shumë prapa.
Skuadra nga Suhareka ka korrur një fitore të thellë, 4-1, në shtëpi ndaj Besës së Pejës, në atë që ishte triumfi i 8-të në këto 10 javë të para, ku Ballkani është ndalur në një barazim, ndërsa ka pësuar edhe një humbje të vetme. Ndërkaq, barazimi pa gola i Gjilanit në fushën e vet përballë Ferronikelit, i ka dhënë mundësi skuadrës tjetër të qytetit, Dritës, që të ngjitet në vendin e dytë të renditjes, edhe falë një fitoreje të shumëdiskutuar, 2-1, të arritur të dielën në fushën e Llapit.
Në fakt, drejtuesit e skuadrës vendase kanë patur shumë kontestime për këtë humbje, duke kërcënuar madje edhe me tërheqje nga gara. Në dy takimet e tjera të kësaj jave, Arbëria është mundur 1-2 përballë Trepçës ’89, ndërsa Prishtina është mundur minimalisht në Skënderaj, përballë Drenicës vendase. Duhet theksuar se ndryshe nga Ballkani, Drita ka luajtur dy ndeshje më pak, atë kundër Prishtinës dhe Llapit, rezultatet e të cilave mund të ndryshojnë shumëçka në renditje
Superliga e Kosovës
Java e 10-të
Të shtunën, 31/10/2020:
Arbëria 1 – 2 Trepça’89
Gjilani 0 – 0 Feronikeli
Ballkani 4 – 1 Besa Pejë
Të dielën, 01/11/2020:
Drenica Skënderaj 1 – 0 Prishtina
Llapi 1 – 2 Drita
Nr. Skuadra N. F. B. H. Gsh-Gp Pikë
1. Ballkani 10 8 1 1 30-12 25
2. Drita 8 6 1 1 13-6 19
3. Gjilani 10 4 5 1 7-5 17
4. Trepça ’89 10 4 2 4 10-11 14
5. Drenica Skënderaj 10 4 2 4 9-17 14
6. Prishtina 9 3 2 4 11-8 11
7. Feronikeli 10 2 5 3 12-10 11
8. Arbëria 10 3 2 5 11-13 11
9. Llapi 9 1 2 6 6-11 5
10. Besa Pejë 10 1 2 7 9-25 5
