Me vetëm 3 titullarë dhe 5 të reja, skuadra e shqiptares mundet 0-3 përballë Imokos. Kapitenia e Kombëtares kuqezi të volejbollit, Erblira Bici, ka qenë kapitene e skuadrës së saj, Kuneo, në ndeshjen e radhës në nivelin më të lartë të kampionatit italian të femrave, në Serinë A1.
Të dielën, ekipi i shqiptares u mund 0-3 përballë Imokos, por kishte në dispozicion vetëm Bicin dhe dy titullare të tjera, ndërsa për të plotësuar numrin minimal prej 8 lojtaresh, janë thirrur 5 lojtare të skuadrës së moshave.
Ka qenë një ditë e jashtëzakonshme, për shumë arsye, e diela për kapitenen e Kombëtares kuqezi të volejbollit, Erblira Bici. 25-vjeçarja ka qenë kapitene e skuadrës së saj, Kuneo, në ndeshjen e radhës në nivelin më të lartë të kampionatit italian të femrave, në Serinë A1.
Ajo që e ka bërë të veçantë këtë ndeshje, përveç të qenit kapitene, ishte fakti se skuadra e shqiptares rikthehej në parket pas disa javësh mungesë, për shkak të infektimit në masë të lojtareve dhe stafit me virusin Covid-19.
Në fakt, plot 10 lojtare të skuadrës janë infektuar dhe i janë nënshtruar prej afro dy javësh karantinës, së bashku me një pjesë të stafit teknik por edhe stafit mjekësor dhe mbështetës të klubit.
Kjo ka bërë që, për ndeshjen me Imokon, Kuneo të ketë në dispozicion vetëm Bicin dhe dy titullare të tjera, ndërsa për të plotësuar numrin minimal prej 8 lojtaresh, janë thirrur 5 lojtare të skuadrës së moshave, që militojnë në nivelin e 4-t të kampionatit italian të rrjetës së femrave.
Përveç kësaj, skuadra e shqiptares ka përshkuar plot 1,000 km brenda ditës për të zhvilluar këtë takim. Ndërkohë, sa i përket vetë ndeshjes, sikundër edhe pritej, skuadra e Bicit e ka humbur atë në 3 sete, me shifrat 11-25, 10-25 dhe 16-25, ndërsa ekipi kundërshtar, kampion në fuqi i Italisë, ka shpalosur shpirtin e lojës së ndershme, duke mos i aktivizuar disa nga titullaret e tij më të spikatura, përfshi këtu edhe të famshmen Paola Egonu.
Kjo ishte humbja e dytë në 5 ndeshje të skuadrës së Kuneos në Serinë A, por ekipi i Bicit ka marrë edhe vlerësimin e Federatës Italiane, por edhe të mbarë komunitetit të volejbollit në Itali për faktin se bëri një sakrificë të jashtëzakonshme për ta zhvilluar këtë takim dhe për të mundësuar vazhdimin e garës në një sezon të vështirë të goditur nga epidemia e virusit korona./Bl.Ba/Fjala.al
