Është skuadra që i ka dhënë tonin futbollit shqiptar të femrave në dhjetëvjeçarin e fundit dhe madje është e vetmja që po mban lart flamurin shqiptar në topkëmbën e vajzave edhe në Evropë. Dhe Vllaznia ka arritur, në mënyrën më dramatike të mundshme, të fitojë pas goditjeve nga pika e bardhë e 11-metërshave ndaj turkeve të ALG Spor. Vajzat shkodrane u treguan më të sakta në lotarinë e 11-metërshave dhe triumfuan pas një ndeshje spektakolare, ku koha e rregullt u mbyll në barazim 2-2, ndërsa dy kohët shtesë në barazim 3-3.
Vllaznia e nisi shumë mirë ndeshjene vlefshme për turin e parë eliminator të Ligës së Kampioneve të Evropës në futboll për femra, duke gjetur golin me Lucie Gjinit në minutën e 7-të. Vajzat turke u munduan të ushtrojnë presion në 45 minutat e para, por barazimi nuk erdhi dhe ato mbyllen me epërsinë minimale të kuqebluve. Në fraksionin e dytë, Vllaznia ndëshkohet brenda pak minutash, kur në minutën e 53-të, Sejfatdinova gjeti golin dhe vendosi baraspeshën. Barazimi e ka zgjuar Vllazninë dhe në minutën e 70-të është sërish Gjini, që rikthen shkodranet në epërsi.
Por një epërsi nuk zgjati shumë sepse Derja Arhan barazon pas vetëm 3 minutash. Ndeshja vijon dramatike dhe 90 minutat mbyllen në barazim, por me karton të kuq për Vllazninë. Curraj ndëshkohet me të dytin e verdhë dhe lë ndeshjen para kohe. Në shtesa, Vllaznia regoi deri në minutën e 118-të, ku Ilajda Xhivelek kaloi për herë të parë në epërsi ALG Spor, me shifrat 3-2. Epërsia u duk se e dorëzoi Vllazninë, por nuk ndodhi kështu. Bajraktari mban në jetë shkodranet, duke shënuar në minutën e fundit të shtesës dhe dërguar të dy skuadrat drejt goditjeve nga pika e bardhë.
Vajzat shkodrane janë më të qeta dhe fitojnë 3-2 nga goditjet e 11-metërshave, pasi 120 minutat ishin mbyllur 3-3. Kualifikimim spektakolar për shkodranet, që merr përmasa të mëdha edhe për rrjedhën e ndeshjes dhe reagimin heroik të vajzave.
Pa.Va/Fjala.al
