Të premten, në mjediset e Federatës Shqiptare të Futbollit në kryeqytet, u zhvillua, nën drejtimin e Presidentit Armand Duka, mbledhja e zakonshme e Komitetit Ekzekutiv të saj.
Në këtë mbledhje u vendos zhvillimi i Asamblesë së Përgjithshme të Jashtëzakonshme për miratimin e statutit të ri të FSHF-së sipas modelit të FIFA-s, e cila do të mbahet në 18 dhjetor 2020.
Ndër të tjera, Komiteti Ekzekutiv i Federatës së Futbollit miratoi rregulloret e zhvillimit të aktivitetit për Kategorinë Superiore, Kategorinë e Parë, Kategorinë e Dytë, Kategorisë Superiore të moshave, Nën-17-vjeçarët dhe Nën-19-vjeçarët, dhe Kampionatin Kombëtar të Futbollit të Femrave.
Në njoftimin e shpërndarë nëpërmjet faqes së vet zyrtare në Internet, organizmi që qeveris futbollin në vend raporton për vendime të rëndësishme, por nuk bëhen publike hollësitë mbi këto ndryshime në rregulloret e kampionateve. Sipas burimeve, ndër temat delikate ka qenë ndryshimi i numrit të lojtarëve të huaj që lejohet të luajnë në Superiore, apo edhe në kategoritë e tjera.
Burime pranë Federatës Shqiptare të Futbollit kanë konfirmuar për RTSH Sport se sezonin aktual do të lejohet të luajnë njëkohësisht 5 të huaj, teksa lejoheshin katër të huaj në një ndeshje të Superiores. Megjithatë, një gjë e tillë nuk është shpallur ende zyrtarisht. Komiteti gjithashtu miratoi propozimin për vazhdimin e projektit “Topi Yt” për katër vitet e ardhshme, 2021-2024.
Pa.Va/Fjala.al
