Vijon “festivali i golave, shënohet plot 48 në 14 ndeshje, gjithsej 92 në të gjithë mbrëmjen. Duke nisur nga ora 21:05, janë zhvilluar të enjten 12 ndeshjet e 6 grupeve të dyta, si dhe dy ndeshje të dy grupeve të para të takimeve të 3-ta të fazës së grupeve të Ligës së Evropës.
Dhe, sikundër takimet që u luajtën më herët, edhe në mbrëmje u shënuar shumë gola, plot 48. Në takimin e vetëm të grupit A që u zhvillua në atë orar, Jang Bojs të Bernës ka mundur në shtëpi 3-0 CSKA-në e Sofias dhe zviceranët janë tanimë 3 pikë pas Romës kryesuese, me pikë të barabarta, 4, me Klujzhin.
Edhe në grupin B, në takimin e vetëm të luajtur më vonë, Arsenali nuk ka gabuar në Londër përballë Moldes, duke fituar me rezultatin 4-1 e duke u shkëputur në krye të renditjes, me pikë të plota, 9, 3 më tepër sesa norvegjezët. Në grupin G, AEK-u i Athinës ka fituar thellë, 4-1 në Ukrainë ndaj Zorias të Luhanskut, ashtu sikundër fitoi thellë, 4-0, edhe Leister Siti në fushën e vet ndaj Bragës dhe anglezët janë shkëputur në krye të renditjes, me pikë të plota, 9, 3 më tepër sesa portugezët.
Në grupin H, Sparta e Pragës ka shtangur Sëlltikun, duke fituar 4-1 në Skoci, ashtu sikundër bëri edhe Lila, duke mundur Milanin 3-0 në “San Siro” dhe duke marrë kreun e renditjes, me 7 pikë, një më tepër sesa italianët. Në grupin I, Sivaspori ka nisur fituar 2-0 në shtëpi ndaj azerëve të Karabagut, ndërsa në takimin që nisi me gjysmë ore vonesë, Vijareali mundi thellë Makabin e Tel Avivit, duke vijuar të ruajë të paprekur kreun e renditjes, me 9 pikë, 3 më tepër sesa izraelitët.
Në grupin J, kanë fituar të dyja skuadrat mike, pasi Totenhemi ka ngadhënjyer 3-1 në Bullgari ndaj vendasve të Ludogoretsit të Razgradit, ndërsa Linzer ASK-së është mjaftuar me një gol të vetëm për të mposhtur në Belgjikë Antverpin. Këto rezultate kanë bërë që anglezët, belgët dhe austriakët të ndajnë kreun e renditjes, me nga 6 pikë pas 3 ndeshjesh.
Ndërkaq, dy fitoret e ekipeve vendëse, Dinamos së Zagrebit në shtëpi, 1-0 ndaj Volfsbergerit, dhe e Fejënordit, 3-1 në Holandë përballë CSKA-së së Moskës ka bërë që beteja të mbetet e hapur në grupin K.
Kroatët që kryesojnë, me 5 pikë, një më tepër sesa holandezët dhe austriakët. Dhe, së fundi, edhe në grupin L ka triumfuar vendëset, teksa Crvena Zvezda ka mundur 2-1 në Beograd Gentin, kurse Hofenhaimi ka shpartalluar 5-0 në shtëpi Slovan Liberecin. Gjermanët kryesojnë me pikë të plota, 9, 3 më tepër sesa serbët.
la.mi/Fjala.al
