FFK shtyn për në mesjavë ndeshjet e mesjavës për shkak të masave të karantinës. Në Kosovë nuk do të zhvillohen në fundjavë veprimtari sportive në mjedise të mbyllura dhe këtë e ka bërë të ditur Ibër Alaj, ushtrues i detyrës së sekretarit të përgjithshëm në Ministrinë për Kulturë, Rini dhe Sport të Kosovë.
Në fakt, Qeveria e Kosovës ka marrë të premten vendimin që ndalon veprimtarinë e të gjitha subjekteve afariste dhe bizneseve, qendrave tregtare e rekreative, supermarketeve, subjekteve që ofrojnë shërbimet e gastronomisë në tërë territorin e Kosovës, nga sot në ora 20:00 e deri të hënën në ora pesë të mëngjesit.
“Në bazë të vendimit të Qeverisë, pezullohen edhe veprimtaritë sportive. Vendimi ka të bëjë me aktivitetet në palestra, jo me ato në mjedis të hapur. Pra futbolli lejohet”, – ka thënë Alaj për mediat e Prishtinës. Por Federata e Futbollit ka bërë të ditur që të shtunën se të gjitha ndeshjet e parashikuara për t’u zhvilluar këtë fundjavë janë shtyrë për mesjavë.
Në fakt, me vendimin e ri të Qeverisë aktivitetet e futbollit nuk janë ndërprerë, por FFK-ja e ka vlerësuar si të nevojshme shtyrjen e ndeshjeve të kësaj fundjave, duke pasur parasysh karantimin e 7 qyteteve për fundjavë si masë për menaxhimin më të mirë të situatës me Covid-19 dhe me qëllim lehtësimin e gjërave për klubet dhe zyrtarët e ndeshjeve, të cilët do të mund të hasnin në pengesa gjatë udhëtimit të tyre për ndeshje në qytetet e karantinuara.
“Kësisoj, garat do të vazhdojnë në mesjavën e ardhshme dhe klubet do të njoftohen me kohë nga komisionet përkatëse për orarin e ri të ndeshjeve”, – sqaron njoftimi i organizmit që qeveris futbollin në Kosovë. Në fakt, në Kosovë është mbyllur faza e parë e këtij sezoni, teksa pritet që të vazhdohet me ndeshjet e javës së 12-të të Superligës.
la.mi/Fjala.al
