Kryeministri Edi Rama shkruan se sa më shumë që Lulzim Basha i shmanget sqarimit të pjesëmarrjes në raportin e Dick Marty, aq më shumë pohon se është kujdestari i dosjes së Shtëpisë së Verdhë.
Më tej Rama thotë se kreu i PD-së ka mbetur kukulla e Saliut, Ilirit dhe Monikës.
“Lulëzim! Sa më shumë i shmangesh sqarimit për lidhjen tende me shpifesirën e Dick Marty dhe rrekesh të fshihesh pas pllakës së gramafonit të prishur, aq më shumë pohon se je kujdestari i dosjes së Shtëpisë së Verdhë dhe përkthyesi i maskuar i shqiptarëve tê marrë në pyetje!
Fakti që nuk ke gjunj të përballesh as me pyetjen, pse e votoi PD-LSI raportin e Dick Marty kur ne e votuam kundër(?), tregon se ti as ke qenë, as je, as bëhesh dot lideri i opozitës, po mbetesh kukulla e Saliut, Ilirit dhe Monikës!” shkruan Rama në Twitter.
Ndërkohë, përmes një postimi në rrjetet sociale, Basha shkruan se Rama nuk ka lidhje me të vërtetën.
Sipas tij, Rama ka gënjyer shqiptarët dhe po i vjen dita që të largohet.
“Çfarë lidhje ke ti me të vërtetën, Edi Rama? Premtove shëndetësi falas- gënjeve. Premtove 300 mijë vende pune-gënjeve. Papunësia në Shqipëri arriti majat. Premtove se do ulësh çmimet e ushqimeve dhe ilaçeve-gënjeve.
Çmimet vetëm janë rritur. Premtove se do ulësh taksat – gënjeve. Premtove se do ulësh çmimin e energjisë – gënjeve. Po vjen dita të largohesh gënjeshtar. Është koha për një të ardhme të re për Shqipërinë!” shkruan Basha.
/la.mi/Fjala.al
