Pasi administroi me sukses rikthimin në fushë të kampionatit më të famshëm të basketbollit në botës, pas epidemisë së Covid-19, Komisioneri i NBA-së, Adam Silver, po mendon që tani për sezonin e ri, atë 2020-2021.
Për momentin nuk ka asnjë datë zyrtare se kur do të nisë kampionati, teksa synohet fundi i dhjetorit ose fillimi i janarit. Sipas mediave amerikane, objektivi i Adam Silverit për të luajtur ndeshjet e para të sezonit të ri është data 22 dhjetor 2020.
Kjo nisje e kampionatit në dhjetor të këtij viti bëhet për arsyen që ai të përfundojë para fillimit të Lojërave Olimpike të Tokios, të shtyra për vitin e ardhshëm. Në këtë mënyrë, yjet e NBA-së mund të shkojnë në Olimpiadë.
Ky skenar parashikon një kampionat me 72 ndeshje në sezonin e rregullt, minimumi për t’u garantuar skuadrave kontrata televizive. Gjithashtu, duke qenë se “All Star Game 2021” është në dyshim për shkak të virusit korona, mendohet që në shkurt ekipet të bëjnë një pushim 2-javor.
Pa.Va/Fjala.al
