Maqedonia e Veriut që prej ditës së djeshme është lëkundur nga tërmete të njëpasnjëshëm.
Tërmeti i parë u regjistrua rreth orës 04:56, me një shkallë rihter 5.1, lëkundjet e tij u ndjen deri në Shqipëri. Ndërkohë një tërmet tjetër me magnitudë 5 të shkallës rihter u regjistrua sërish rreth orës 15:25, epiqendra e tij ishte po në të njëjtin vend ku u regjistrua tërmeti i orëve të para të mëngjesit.
Në lidhje me këto lëkundje sizmike kanë reaguar edhe ekspertë të rëndësishëm në Maqedoni të cilët kanë shpjeguar arsyet se përse ndodhën këto tërmete.
Gjorgji Manaskov nga Oda Ekonomike për Energjetikë, u shpreh se tërmetet janë shkaktuar nga mbushja dhe zbrazja e liqeneve, presioni i cili bën që pllakat të lëkunden.
Megjithëse nuk është një shpjegim i bindshëm shkencor, Oda Ekonomike për Energjetikë është e bindur se e ka gjetur shkakun e rënies së tërmetit.
“Arsyeja kryesore për tërmetet, mes të tjerash, është edhe mbushja dhe zbrazja e papritur e liqeneve. Njëra nga arsyet kur mbushen liqenet, vjen momenti kur për shkak të presionit, pllaka fillon të lëvizet gjatë një periudhe të caktuar dhe të shkaktojë lëvizje, respektivisht tërmete”, deklaroi Gjorgji Manaskov./R.G/Fjala.al
