Kryeministri Edi Rama thotë se opozita po nxin qëllimisht dhe duke gënjyer situatën e pandemisë në vendin tonë.
Rama tha se duke shpifur dhe gënjyer për gjendjen alarmante në spitale, opozita po terrorizon familje të tëra si dhe po tmerron të moshuarit.
Kreu i qeverisë tregoi edhe një mesazh që ia kishte dërguar “një personalitet i shquar publik”, identitetin e të cilit nuk e zbuloi.
Sipas Ramës, ai i kishte shkruar se “mund të flinte i qetë”, pasi kishte parë pamjet reale në spitalet Covid në vendin tonë.
“Nuk ndodh që të gjendet nëj opozitë, që edhe për një pandemi që bie në 100 shekuj, nuk gjen dot arsyet për t’u bashkuar, jo me qeverinë, por me shumicën e njerëzve që janë në hall.
Dhe opozita në këtë rast është për ta qarë hallin, sepse është detyra jonë ta zgjidhim, siç po përpiqemi, por jo të bëjë opozita politikë me hallin deri në pikën që t’u kallë frikën, ti rrisë pasigurinë, duke përdorur instrumenta të ulëta si shpifje, fabrikime, duke arritur realisht të shqetësojë familje e familje të tëra.
Sot kam marrë një mesazh nga dikusht që nuk kam autorizim t’i përdorë emrin, nga një personalitet në moshë të thyer që më shkruan se “më në fund kam mundur të flej gjumë, pasi pashë realitetin e spitaleve, pasi nuk arrija do të flija gjumë nga ankthi që po të infektohesha nuk do gjeja dot shtrat në spital.
Dhe është një personalitet i shquar. Ishte një mesazh çlirimi nga barra e tmerrshme mendore që kjo opozitë i ka ngarkuar atij dhe shumë të moshuarve si ai,” deklaroi ndër të tjera kryeministri Edi Rama.
