21 të burgosur shqiptarë të dënuar për vepra të ndryshme penale në Britaninë e Madhe janë dëbuar nga shteti ishullor dhe janë ekstraduar në vendin tonë.
Mësohet se ata u sollën në Shqipëri një ditë më parë përmes një linje fluturimi drejt Tiranës.
Sekretarja e Brendshme e Britanisë së Madhe, Priti Patel tha se kriminelët shqiptarë, por edhe shtetasit e tjerë të huaj të dënuar, do të dëbohen nga Anglia dhe do të dërgohen në shtetet e tyre për të vuajtur dënimet.
“Këta kriminelë të huaj dhe të rrezikshëm nuk kanë vend në shoqërinë tonë”, tha Patel.
Mediat britanike raportojnë se në mesin e shqiptarëve që u kthyen në Tiranë ishin Arjon Hyseni 30 vjeç, i dënuar me 8 vite burgim për trafik kokaine me vlerë 4.5 milionë Paund dhe Agim Isufi 19 vjeç i dënuar me 20 muaj burgim për një fabrikë kanabisi.
Javën e kaluar, Britania e Madhe dëboi nga vendi 20 shtetas të huaj të dënuar për vepra të ndryshme.
Autoritetet britanike thonë se dëbimet nga vendi për shtetasit e huaj të dënuar do të vijojnë.
Më shumë se 6400 të huaj me precendent penal janë larguar nga Britania që prej vitit 2019. /Re.D/Fjala.al
