Vendimi i Turqisë për të furnizuar me dronë vrasës Serbinë ka ngjallur reagimin e Qeverisë Shqiptare. Përmes Ministrit të Diasporës, Pandeli Majko ka shprehur gjithë indinjatën për këtë ‘tradhti’ të marrëdhënieve të mira shqiptaro-turke.
Në studion e “Abc” Majko nuk pranoi ta cilësoi armike Turqinë, por ky fakt do të mbahet shënim në marrëdhëniet mes dy shteteve.
“Ne kemi tre marrëdhënie strategjike, por Turqia ka një distancë, por e konsiderojmë të afërt. Turqia po furnizon me armatim Serbinë, e di, secilido e kupton se ne mbajmë shënim në marrëdhëniet shqiptare turke, kjo regjistrohet, kaq. Do të mbetet e shkruar në memorien shqiptaro-turke, nuk thashë po e shpallim armike Turqinë”
“Furnizuesi i parë i Serbisë është Rusia. Në panik nuk duhet të jemi, sikur kanë ata miqtë e tyre, kemi edhe ne miqtë tanë. Ata (Kosova) nuk kanë tjetër veç nesh dhe nuk kemi tjetër përveç atyre” tha ai.
Ndërkohë, Majko nuk përjashtoi një konflikt të ri mes Kosovës dhe Serbisë, si ai në Nagorni-Karabakh, por premtoi se trupat serbe do të përballen me trupat e NATO-s dhe ato shqiptarë, që të organizuar ose jo do të bëjnë një gjë që s’e kanë herën e kaluar.
“Nëse do të ketë një konflikt si në Nagorni-Karabakh, trupat serbe do të përballen me trupat e NATO-s. Dhe po bëri vaki që të ndodhë kjo histori që do të thotë ripërsëritje e luftës së Kosovës, po ju them që shqiptarët të organizuar dhe të paorganizuar, do të bëjnë një gjë që s’e kanë bërë as herën e kaluar. Dhe këtë Serbët duhet ta dinë shumë mirë. Kur shqiptarët fituan një luftë me NATO, pa pasur shtet, pa pasur ushtri, pa pasur strukturat shtetërore, imagjinoni se çfarë bëjnë duke e pasur Kosovën.”
“Është e rëndësishme t’iu them se konflikti Nagorno-Karabak tregon se konfliktet e ngrira mund të përshkallëzohen në çdo moment. Situata me Kosovën nuk do të jetë e lehtë në muajt e ardhshëm. Nuk duhet t’ua lëmë fëmijëve tanë konfliktin e ngrirë”, përfundoi Majko.
l.m/Fjala.al
