Kombëtarja shqiptare e Nën-21-vjeçarëve e ka mbajtur ende gjallë shpresën për të marrë vendin e dytë në grup, pasi ka fituar të premten në Kosovë me një gol të vetëm.
Kështu, Shpresat e Shqipërisë kanë korrur të premten një fitore minimale, por mjaft të vyer në Prishtinë ndaj bashkëmoshatarëve të Kosovës, duke marrë 3 pikët që i mbajnë kuqezinjtë e vegjël në lojë për vendin e dytë të grupit të 3-të të Eliminatoreve të Evropianit të Nën-21-vjeçarëve.
Nën-21-vjeçarët kuqezinj, që janë drejtuar në takimin ndaj Kosovës, ashtu siç do të drejtohen edhe në takimin e fundit nga veterani boshnjak, Xhemal Mustedanagiç, në mungesë të trajnerit Alban Bushi, të prekur nga virusi “Covid-19”, kanë qenë cinikë në lojën e tyre, duke korrur kështu fitoren e 4-të në këto 9 ndeshje të deritanishme të këtij grupi. Do të jetë Enis Çokaj ai që do të konkretizojë mbizotërimin e kuqezinjve në pjesën e parë, duke shënuar në minutën e 35-të.
Menjëherë më pas, kuqezinjtë e vegjël do të kenë një mundësi të shkëlqyer për të dyfishuar shifrat, por futbollisti tjetër që luan tek Lokomotiva e Zagrebit, Indrit Tuci, nuk arrin të mposhtë i vetëm portierin e Kosovës. Me epërsinë minimale të Shpresave do të mbyllen 45 minutat e para, ndërsa ato të dytat kanë qenë të luftuara dhe drejt fundit, kanë parë përfaqësuesen e Nën-21-vjeçarëve të Kosovës të jetë më agresive, por pa e thyer dot qëndresën e kuqezinjve.
Shqipëria fiton kështu 1-0 në Prishtinë, dhe, duke përfituar nga fitorja me përmbysje e Nën-21-vjeçarëve të Turqisë ndaj atyre të Austrisë, tanimë është ngjitur në kuotën e 14 pikëve, një më pak sesa austriakët e vendit të dytë, teksa ka mbetur edhe një ndeshje për t’u luajtur.
Pa.Va/Fjala.al
