Me një total prej 5 000 mjekësh shtesë të nevojshëm si rezultat i pandemisë, problemi i mungesës së stafit mjekësor të Italisë është përkeqësuar. Autoritetet shëndetësore thonë se kanë mjaftueshëm ventilatorë për të përballuar valën e dytë, por jo numrin e nevojshëm të mjekëve për t’i përdorur ato.
“Problemi me të cilin po përballemi është se vetëm specialistët mund të punojnë brenda njësive të kujdesit intensiv. Kjo përfshin si mjekë të specializuar ashtu edhe infermierë. Sidoqoftë, shifrat nuk janë inkurajuese, na duhen 2 000 mjekë që mund të operojnë me makineritë e frymëmarrjes“, thotë Carlo Palermo, drejtues i Unionit të Mjekëve.
Qeveria ka planifikuar të rrisë numrin e shtretërve në njësitë e kujdesit intensiv nga 5 200 ekzistues në një total prej rreth 11 000. Kjo nënkupton shtimin e më shumë shtretërve ku tashmë ka mungesë të personelit mjekësor, që do të thotë ulje të nivelit të sigurisë dhe cilësisë së trajtimeve.
Në Itali, rajonet mund t’i marrin vetë vendimet kur është fjala për sistemin shëndetësor. Zona si Piemonte dhe Lombardia u kanë kërkuar OJQ-ve ndihmë duke u kërkuar të dërgojnë mjekë nga e gjithë bota.
Shoqata e Mjekëve të Huaj që jetojnë në Itali përfaqëson 77 500 profesionistë të shëndetësisë.
Për ushtrimin e profesionit është kriter nënshtetësia, por për shkak të emergjencës që ka krijuar Covid-19, një dekret i posaçëm lejon aplikimet e të huajve.
Shoqata në fjalë ka kërkuar që kjo lehtësi të shtrihet në të gjithë vendin./Re.D/Fjala.al
