Pas një diskutimi të gjatë, Parlamenti miratoi me 84 vota pro, 9 kundër dhe 4 abstenim buxhetin e vitit 2021, ku bie në sy shtesa për sektorin e shëndetësisë dhe veçanërisht për përballimin e pandemisë. Rama: Investuam në spitale, kemi prenotuar vaksinën anti-Covid
Nga Fernada Cenko
Kuvendi i Shqipërisë miratoi buxhetin e shtetit për vitin 2021 me 84 vota pro, 9 kundër dhe 4 abstenim. Duke prezantuar draftin, kryeministri Edi Rama ka bërë me dije se do të dyfishohet ndihma ekonomike për periudhën e pandemisë.
Ai ka bërë me dije se kjo është një masë e domosdoshme, teksa shtoi se është paguar kapari për të marrë vaksinën anti COVID si pjesë e paketës COVAX. “Strategjia e testimit lidhet me identifikimin dhe gjurmimin. Nuk testohet për të testuar.
Sot në Lombardi, në rajonin më të pasur të Italisë, me shëndetësi ekselente, autoritetet shëndetësore nuk të bëjnë tamponin, nëse nuk ke simptoma të një grade të caktuar, por të thonë të qëndrosh në shtëpi.
Vajtja me turravrap për të bërë tamponin te privati dhe për të paguar atje para, që shpenzohen në mënyrë të panevojshme, mund të shërbejë për të hequr një merak, por nuk ka lidhje me mënyrën e trajtimit të armikut në këtë luftë. Asnjë shtet sot që flasim, tani, nuk bën më atë që bënte në periudhën e mëparshme.
Edhe shtetet që bënin testime, testime, tani janë frenuar, duke u përpjekur të fokusohen aty ku Shqipëria dhe disa vende të tjera janë fokusuar qysh në krye të herës. Jo se jemi më të zotë, por se kjo ka qenë strategjia e zgjedhur nga ekspertët tanë”, është shprehur Rama.
Sipas tij, nëse Komiteti Teknik do thoshte të bliheshin teste më shumë, normalisht që do të bliheshin. “Siç gjetëm mundësinë të paguajmë naftëtarët, edhe pse nuk ishte një hall i krijuar nga ne. Siç kemi vendosur të dyfishojmë ndihmën ekonomike nga janari i vitit tjetër, patjetër që do ta gjenim mundësinë për të shtuar testet”, u shpreh Rama.
Sipas Ramës, situata nuk është jashtë kontrollit. “Por në fund të ditës ka vetëm një mënyrë për të gjykuar situatën, sa të infektuar ke, sa fatalitete ke dhe sa shtretër ke në dispozicion.
Nëse në këto të treja nuk je në gjendje alarmi, do me thënë se po bën gjënë e duhur. Nëse në këto të treja, Shqipëria nuk është asgjëkundi në vendet që kryesojnë listat për të infektuar, të vdekur dhe kapacitete në shtretër, por është në një dispozicion që hyn te normale, atëherë tjerat janë asgjë.
Mund të ndodhë në proces, nuk e dimë, por ndaj jemi përgatitur për më të keqen. Nëse numrat shkojnë përtej kapaciteteve, kemi spitalet rajonale, por sot nuk ka ndodhur. Edhe në rajonin tonë ne jemi me parametrat më lehtësues.
Ne do të bëjmë gjithçka, të gjithë së bashku, që deri në fund të kemi një bilanc për të cilin të jemi të gjithë të lehtësuar me vetveten dhe me njerëzit, që bëmë gjithçka mundëm dhe Shqipëria doli nga kjo luftë me të gjitha pasojat, që çdo luftë sjell, por me asnjë pasojë më shumë se gjithë të tjerët.
Kemi paguar kaparin për COVAX, kemi prenotuar për të marrë vaksinën. Jemi në komunikim të përditshëm me BE, unë kam pasur një bisedë të gjatë me presidentet e Komisionit”, tha Rama”, deklaroi kryeministri Rama.
Teksa foli për shëndetësinë, Rama deklaroi se kjo është rritja më e madhe e buxhetit të shëndetësisë në 30 vitet e fundit. Duke bërë dhe një krahasim me spitalet e disa viteve më parë dhe gjendjen aktuale, ai thotë se ndryshimi është si nata me ditën. “Masa të reja që do të qëndrojnë aty përtej vitit të ardhshëm.
Qytetarët që preken nga virusi COVID-19 dhe ata që hyjnë në kategorinë me ndihmë ekonomike. Së pari rritja e buxhetit të shëndetësisë në vitin 2021 është rritja më e lartë në të gjitha këto 30 vjet për shëndetësinë në një buxhet të shtetit.
Plus 23.3 %, një rritje e pandodhur më parë që siç e thashë lidhet me masat e reja që do të qëndrojnë aty qoftë edhe me fuqizimin e vijës mbrojtëse për të dalë kryelartë nga kjo luftë. Shqipëria nuk ka asgjë mangët nga gjërat e tjera.
Sikur kjo flamë ta kishte gjetur Shqipërinë me spitalet kur ne morëm detyrën. Ishim në spitalin e Vlorës në sallën e re të reanimacionit, dallimi mes çka kemi sot dhe çka kishim dje ishte realisht dallimi i ditës me natën dhe i tillë është edhe në QSUT dhe në spitalet e tjera rajonale.
Në spitalin e Vlorës në 2014 kishte vetëm 2 aparatura të vjetra të kohës së marrëdhënieve shqiptaro-kineze. Sot linjat e oksigjenit, aparaturat që suportojnë trajtimin e pacientëve me oksigjen janë në të gjithë sistemin tonë të mbrojtjes kundër COVID”, tha Rama.
Miratimi i projektbuxhetit në Kuvend i hap rrugë zbatimit të tij nga 1 janari i vitit 2021.
Rritja ekonomike parashikohet në 4.8 dhe 4.5% respektivisht për vitet 2022 dhe 2023. Norma e papunësisë parashikohet me ulje në 2021-n në nivelin 12.2% krahasuar me të pritshmin e vitit 2020 prej 13.9%.
Rritja ekonomike dhe punësimi, do të mbështetet edhe nga objektivi tjetër i planifikuar në këtë buxhet, ai i sigurimit të një niveli të lartë të investimeve publike prej 7.2% e PBB. Në vitin 2021, të ardhurat totale të buxhetit të shtetit parashikohen të arrijnë 479 miliard lekë, nga këto, të ardhurat tatimore 437 miliardë lekë dhe brenda zërit të të ardhurave tatimore, të ardhurat që mblidhen nga tatimet dhe doganat 311 miliard lekë. Ndërkohë, të ardhurat nga kontributet planifikohen 99,7 miliardë lekë.
Medikamentet anticovid
Një tjetër element veçues i këtij p/buxheti është edhe angazhimi i qeverisë për rimbursimin e paketës bazë të medikamenteve për të gjithë qytetarët që do të preken nga COVID-19 dhe do të trajtohen në kushte ambulatore, pra do të trajtohen në shtëpi, nën mbikëqyrjen e mjekut të familjes.
Për të mbështetur këtë politikë, Komisioni Parlamentar i Ekonomisë dhe Financave gjatë diskutimit nen për nen të p/buxhetit miratoi një fond shtesë prej 1.2 miliardë lekësh për ministrinë e Shëndetësisë dhe Mbrojtjes Sociale.
Dyfishimi i ndihëm ekonomike
Gjithashtu në kuadër të luftës kundër përhapjes së COVID-19, qeveria vendosi edhe dyfishimin e ndihmës ekonomike deri në fund të pandemisë. Përmes këtij buxheti bëhet e mundur edhe rritja e pagave për mjekët, infermierët dhe laborantët me 40% si dhe e mësuesve me 15%.
Sektori i Bujqësisë
Mbështetje më të madhe gjatë diskutimit nen për nen të p/buxhetit në komisione mori edhe ministria e Bujqësisë, si i vetmi sektor i cili pavarësisht situatës së krijuar prej COVID-19, dha ndikim pozitiv në ekonomi.
“Pas recesionit të fortë në vitin 2020, aktualisht i parashikuar në -6.1%, ekonomia pritet të rikuperohet në vitin 2021 dhe të vijojë trendin pozitiv në periudhën afatmesme. Rritja ekonomike parashikohet në 5.5% në vitin 2021 dhe parashikohet të vijojë të qëndrojë afër nivelit prej 4.9% përgjatë periudhës afatmesme në vijim”, tha ministrja e Financave dhe Ekonomisë, Anila Denaj.
Investimet Publike
Totali i investimeve publike për vitin 2021 planifikohet në masën 7.2% e PBB ose 120.6 miliardë lekë, përfshirë këtu dhe fondin e rindërtimit në shumën 27 miliardë lekë. Në planifikimin e investimeve për vitin 2021 janë mbajtur në konsideratë të gjitha detyrimet kontraktuale për projektet e investimeve me financim të huaj dhe të brendshëm. Për shpenzimet publike për vitin 2021 janë planifikuar 587.6 miliardë lekë ose 34.9% e PBB.
Rriten pagat për mjekët dhe infermierët
Projektbuxheti për vitin 2021, synon rimëkëmbjen ekonomike të vendit pas dy fatkeqësive natyrore, tërmeti i 26 nëntorit 2019 dhe pandemia e shkaktuar nga COVID-19. Kjo rimëkëmbje, do të kryhet përmes skemave të nxitjes së punësimit, mbështetjes proaktive ndaj biznesit, rindërtimit të plotë të banesave të qytetarëve të prekur nga tërmeti si dhe masave parandaluese të përhapjes së mëtejshme të COVID-19.
Rama dhe Meta përplasen për testet e Covid-19
Presidenti: Shtoni testimet, kryeministri: Nuk kemi lënë asnjëgjë mangut
Twitter dhe Facebook duket se i ka bërë më komod politikanët tanë. Duke mos qëndruar para foltores kanë zgjdhur që debatin ta zhvillojnë në rrugë virtuale. Presidenti i Republikës Ilir Meta ka bërë një status në “Facebook” ku i bën një thirrje qeverisë që të shtojë numrin e testimeve për identifikimin e rasteve me COVID-19.
Kreu i Shtetit thekson se testimi është mjet tepër efikas për diagnostikimin dhe gjurmimin e rasteve me koronavirus. Sipas Metës, duhet të testohen stafi mjekësor si dhe mësuesit, të moshuarit dhe personat me sëmundje kronike.
”Në këtë moment kritik të përhapjes së pandemisë, është jetike të shtohet masivisht numri i testimeve. Testimi është mjeti tepër efikas për diagnostifikimin, gjurmimin dhe trajtimin në kohë të qytetarëve të prekur nga COVID-19. Testimi është mundësia e vetme për të vendosur kontrollin mbi situatën dhe për të organizuar përgjigjen e sistemit shëndetësor për çdo qytetar të prekur nga COVID-19”, shkruan Meta.
Ai thekson se si hap i parë, duhet të testohen menjëherë: Të gjithë mjekët, infermierët dhe personeli mbështetës në sistemin e shëndetësor, parësor dhe spitalor, të cilët janë në vijën e parë të përballjes me COVID-19; Të gjithë arsimtarët, në çdo nivel, për shkak se testimi dhe gjurmimi pasues i rasteve të tyre lidhet drejtpërdrejt me shëndetin e fëmijëve tanë; Të gjithë të moshuarit e vetmuar, të cilët jetojnë të shtëpitë e kujdesit social; Të gjithë qytetarët me sëmundje bashkëshoqëruese”, shkruan Meta duke shtuar se për të gjitha këto kategori është tepër e nevojshme, sipas rekomandimeve të OBSH-së dhe organizatave të tjera, të nisë menjëherë edhe vaksinimi me vaksinën e gripit stinor.
Kryeministri Edi Rama ka reaguar pas deklaratës së presidentit Ilir Meta, ku kërkonte që të shtohej numri i testimeve për gjurmimin e COVID-19. Përmes një mesazhi në “Facebook” Rama theksoi se shifrat e infektimeve në vendin tonë është nën mesataren e rajonit, po ashtu dhe rastet e humbjeve të jetëve.
Teksa ndalet tek spitalet Covid, Rama shton se: “asgjë mangut nga kudoqoftë tjetër nëpër Europë”. “Infektime nën mesataren e rajonit. Humbje jete nën mesataren e rajonit. Spitalet Covid asgjë mangut nga kudoqoftë tjetër nëpër Europë. Mjekë e infermierë të palodhur. Qeveri në krye të detyrës”, shkruan Rama ndërsa ka vënë theksin tek higjena dhe mbajtja e distancës.
l.m/Fjala.al
