Trajneri Edoardo Reja ka bërë katër lëvizje ndaj Bjellorusisë, duke ndryshuar edhe përbërjen e 11-shes kuqezi që do të rreshtohet në fushën e blertë.
Pas pak, duke nisur nga ora 16:00, Shqipëria do të luajë ndeshjen finale kundër Bjellorusisë. Për këtë ndeshje, trajneri i Kombëtares, ka bërë 4 ndryshime të rëndësishme, teksa Doka, Memolla, Laçi dhe Gjasula do ta nision si titullarë. Elseid Hysaj do të mungojë në këtë ndeshje, pasi është zbuluar se është prekur nga COVID-19.
Ndërkohë që, Abrashi mungon për këtë ndeshje për shkak të kartonëve, ndërsa Kallaku dhe Uzuni e nisin nga stoli. Ndeshja mes Shqipërisë dhe Bjellorusisë do të jetë e shtata në historinë mes dy skuadrave, duke përfshirë ato zyrtaret dhe miqësoret. Shqipëria numëron 2 fitore, 2 barazime dhe 2 humbje me Bjellorusinë. Kuqezinjtë kanë shënuar 7 gola dhe kanë pësuar 8. Krahas barazisë në përballjet direkte, sa herë është bërë fjalë për arritje në eliminatore, Bjellorusia e ka mbyllur gjithmonë në epërsi ndaj Shqipërisë.
Ndërkaq, kjo ndeshje, për vendin e pare, sjell gjithashtu një sërë përfitimesh. Së pari, është kualifikimi për ne çerekfinalet e Ligës se Kombeve për këtë edicion. Vete vendi i pare sjell 1.125 milionë euro shpërblim për FSHF-në, njësoj sa shifra e pjesëmarrjes ne këtë lige. Së dyti, vendi i parë e ngjit Shqipërinë në Ligën B për edicionin e ardhshëm, me skuadra edhe më të forta dhe me më tepër te ardhura. Së treti, vendi i pare i jep Shqipërisë shanset për t’u ngjitur një vazo me lart në Eliminatoret e Botërorit 2022, bazuar ne renditjen e përfaqësueseve evropiane me kriter pikërisht ecurinë ne Ligën e Kombeve.
FORMACIONET ZYRTARE:
SHQIPËRIA: (3-5-2) Berisha, Ismajli, Gjimshiti, Veseli, Doka, Memolla, Memushaj, Gjasula, Laçi, Cikalleshi, Manaj. Trajner: E. Reja
BJELLORUSIA: (4-4-2) Katekeviç, Juzesçuk, Poliakov, Saçivko, Bordaçev, Ebog, Maevski, Jablonski, Sataseviç, Lisakoviç, Skavish. Trajner: M. Markhel.
