Fitorja e kuqezinjve, 3-2 ndaj Bjellorusisë, që bëri që Shqipëria ta mbyllë fushatën e Ligës së Kombeve në vendin e parë në grupin e 4-t të Ligës C, e ka entuziazmuar edhe Presidentin e Republikës, Ilir Meta.
Kreu i Shtetit reagoi në rrjetet sociale, duke përgëzuar ekipin kuqezi, veçanërisht sulmuesin Sokol Cikalleshi, i cili ka shkëlqyer nën drejtimin e trajnerit Edoardo Reja, duke realizuar dy nga tre golat e fitores ndaj Bjellorusisë.
Sulmuesi kavajas ka realizuar 4 gola në 6 ndeshjet e Shqipërisë në Ligën e Kombeve. Në mesazhin e tij, pas fitores së Shqipërisë me Bjellorusinë, Presidenti Meta shkruan:
“Cikalleshi është i paparë! Premton një dhe bën dy! Urime kuqezinjve tanë!”
“Shqipëria e para! Urime kuqezinjve për shpirtin luftarak!” – përfundon mesazhi i kreut të shtetit. Ndërkaq, pas fitores ka reaguar në rrjetet sociale edhe presidenti i Federatës Shqiptare të Futbollit, Armand Duka.
“Fitore e madhe, që erdhi në çastin e duhur, – shkruan kreu i organizmit që qeveris futbollin shqiptar. – Sot djemtë kuqezinj na dhuruan emocione, sakrificë, kualitet, gola dhe mbi të gjitha për ngjitjen një grup më lart në Ligën e Kombeve të Evropës.”
“ Një objektiv i realizuar. Ndjehem krenar për kombëtaren dhe stafin e saj. Krenar për arritjet e futbollit shqiptar. Historia vazhdon…”, – përfundon mesazhi i presidentit të FSHF-së.
