Armando Broja mori shumë minuta, në dy sfidat në fushë të huaj që Kombëtarja shqiptare zhvilloi në muajin tetor ndaj Kazakistanit dhe Lituanisë.
Por, këtë herë, ai u largua shumë shpejt nga grumbullimi i kuqezinjve, zyrtarisht për shkak të problemeve fizike, duke mos qenë i pranishëm në dy takimet që Shqipëria fitoi në shtëpi në Ligën e Kombeve të Evropës ndaj Kazakistanit dhe Bjellorusisë.
Por, duke iu referuar lajmeve të fundit që vijnë nga mediat holandeze, sulmuesi i talentuar, i cili në këtë sezon është huazuar nga Çellsi tek Vitese e Arnhemit, do të jetë gati për përballjen e kësaj fundjave në kampionatin holandez ndaj Groningenit, pasi i ka lënë pas problemet fizike.
Një rikuperim në kohë rekord ky i Brojës, që sidoqoftë ngre dyshime se mund të ketë pas ndonjë fërkim mes sulmuesit dhe trajnerit Reja për atë largim të papritur nga grumbullimi i kombëtares. Duke folur asokohe për në lidhje me largimin e Brojës, trajneri Reja deklaroi në konferencën për shtyp para ndeshjes me Bjellorusinë, se ai ishte i detyruar të largohej për shkak të problemeve fizike.
Sulmuesi u stërvit vetëm një ditë pasi mbërriti në Shqipëri, pasi sipas stafit kuqezi, kishte probleme muskulore dhe nuk ishte në gjendje që të jepte kontributin e tij në fushën e lojës. Por tanimë ai është gati për ta nisur që nga minuta e parë përballjen e radhës në kampionatin holandez./Bl.Ba/Fjala.al
