Pishina më e thellë në botë këtë fundjavë u përurua pranë Varshavës. Ky objekt është pagëzuar si Deepspot dhe është 45.5 metra i thellë dhe ka për qëllim trajnimin e zhytësve.
Në të janë ndërtuar kopje të ngjashme të shpellave nënujore, madje është riprodhuar edhe një anije e mbytur.
Janë dashur rreth 8 mijë metra kub ujë për të mbushur pishinën, e cila ka një gjatësi prej 25 metrash.
Ndryshe nga pishinat e zakonshme të rezervuara vetëm për të notuar, kompleksi Deepspot, pavarësisht nga pandemia Covid-19, mund të mirëpresë klientë, pasi konsiderohet si një qendër trajnimi zhytjeje që ofron kurse private.
Ky objekt në të ardhmen do të përfshijë edhe një sistem hotelerie, ku nga dhomat e të cilit, do të jetë e mundur të shikohen zhytësit në një thellësi prej pesë metrash.
“Kjo pishinë është me e thella në botë”, tha drejtori i Deepspot, Michal Braszynski.
Rekordi i mëparshëm, fitues edhe i çmimit Guinness, u shënua nga pishina Montegrotto Terme në Itali, me një thellësi prej 42 metra.
Megjithatë, rekordi polak do të jetë i shkurtër, pasi Abyss Blue, një pishinë me një thellësi 50 metra është planifikuar të hyjë në punë vitin e ardhshëm në Britaninë e Madhe.
“Këtu s’ka peshq të bukur ose shkëmbinj nënujorë koralesh dhe aq më tepër ta konsiderojmë si diçka që mund të zëvendësojë detin, por është një vend i mirë për t’u stërvitur dhe për të mësuar të zhytësh në mënyrë të sigurt”, tha Przemyslaë Kacprzak, një instruktor 39-vjeçar i zhytjes, i cili ishte një nga dhjetra klientët e pranishëm në hapjen e pishinës Deepspot.
Drejtori i saj bëri me dije se pishina do të përdoret edhe për trajnimin e zjarrëfikësve dhe ushtrisë.
“Pishina ofron skenarë të shumtë, ku mund të lejojë përdorimin e pajisjeve të ndryshme”, deklaroi ai.
Për ndërtimin e Deepspot u nevojiten rreth 5.000 metra kub beton, dy vjet punë dhe 8.9 milionë euro./Re.D/Fjala.al
