Ekspertë ndërkombëtarë të virologjisë pritet të shkojnë së shpejti në Kinë për të hetuar në lidhje me origjinën e koronavirusit.
Organizata Botërore e Shëndetit (OBSH), i ka bërë thirrje ekspertëve që të shkojnë sa më parë në Kinë, për të nisur nga puna.
OBSH tha se kishte marrë sigurinë nga Pekini se ekspertët janë në gjendje të udhëtojnë drejt Kinës.
“Ne presim plotësisht dhe kemi siguri nga kolegët tanë kinezë që do të na krijojnë të gjitha lehtësitë, sa më shpejt të jetë e mundur”, tha drejtori i urgjencave i OBSH, Michael Rayn.
Më herët OBSH ka kritikuar Europën dhe përgjigjen e saj ndaj pandemisë, duke nënvijëzuar faktin se nuk arritën të përfitonin nga stina e verës dhe qetësia e saj për të parandaluar valën e dytë.
David Nabarro, zëdhënës i OBSH ka paralajmëruar se Europa mund të përballet me një valë të tretë vdekjeprurëse të pandemisë në fillim të vitit 2021.
“Teksa u morën me valën e parë nuk u kujdesën për të dytën. Historia mund të përsëritet me një valë të tretë nëse nuk ndërtohet infrastruktura e nevojshme”, tha Nabarro.
Për pak kohë, Europa u qetësua disi nga rastet me Covid-19, por aktualisht mbeten në rritje./Bl.Ba/Fjala.al
