Krutanët fitojnë 2-1 në një duel nervash, vendasit e luajnë pjesën e dytë me 10 lojtarë. Kastrioti ka korrur fitoren e 3-të në këto 4 javë të para të këtij sezoni të Kategorisë Superiore, teksa ka mundur 2-1 Skënderbeun në takimin e luajtur të mërkurën në Korçë. Në fakt, ndeshja ka nisur më mirë për krutanët, të cilët kanë patur një pretendim të diskutueshëm për një 11-metërsh, por të hedhur poshtë nga gjyqtari nga Laver Alla, në minutën 9-të.
Ndërsa 7 minuta më pas, një mosmarrëveshje e portierit dhe mbrojtësve vendas për pak sa i jep mundësi Da Silvës të shënojë. Duhet theksuar se, brenda 24 minutave të para, trajneri i Kastriotit, Ramadan Ndreu, detyrohet të bëjë dy zëvendësime, teksa Bojomo dhe Çela lënë fushën të dëmtuar. Kastrioti vazhdon të provojë me anë të Plakut dhe Mehmetit dhe do ta gjejë golin në 6 minuta para fundit të pjesës së parë, me anë të Da Silvës, që shfrytëzon një gabim në mbrojtje nga ana e Qaqit, duke përshëndetur rrjetën.
Me epërsinë minimale të miqve do të mbyllet pjesa e parë, por e dyta nis më mirë për Skënderbeun, që do të rrezikojë, 3 herë brenda 10 minutave të parë, me Mensanë, Marën dhe Pusin, por pa e mposhtur dot kryeqytetasin e portës krutane, veteranin Isli Hidi. Por detyra e vendasve do të vështirësohet në minutën e 55-të, kur Mensah del nga loja me karton të kuq për një gjest antisportiv në dëm të kundërshtarit. Kastrioti e rrëmben menjëherë mundësinë që i paraqitet dhe, pasi Plaku e ka vënë në provë, por pa e mposhtur dot Dajsinanin në minutën e 58-të, është Okebugu që e bën një gjë të tillë, duke dyfishuar epërsinë e miqve vetëm 3 minuta më pas.
Gjysmëora e mbetur e lojës do të shohë krutanët të administrojnë epërsinë përballë një Skënderbeu që, ndonëse me një lojtar më pak, do ta synojë sidoqoftë portën e Hidit me anë të Çelës, pastaj të Marës dhe do ta arrijë ta gjejë rrugën e rrjetës, por vetëm në minutën e 4-t shtesë, me anë Armah. Është shumë pak dhe shumë vonë për Skënderbeun, që mundet -1-2 nga Kastrioti dhe mbetet në kuotën e 4 pikëve të marra në po aq ndeshje, ndërsa krutanët kanë grumbulluar 8 nga 12 të mundshme, por vijojnë të mos e njohin humbjen.
l.m/Fjala.al
