Deputeti i opozitës Halit Valteri gjatë fjalës së tij në Kuvend ka folur për situatën aktuale nga pandemia e koronavirusit si dhe ka kujtuar tërmetin që goditi vendin një vit më parë ku humbën jetën 51 persona dhe qindra të tjerë u plagosën.
Teksa është shprehur se ky vit na ka lënduar të gjithëve, ai ka theksuar se humbjet dhe dhimbjet kanë prekur secilin prej nesh.
Valteri ka deklaruar se shqiptarët ndodhen përballë dy mundësive, falimentimit nga mbyllja ose lirisë që sjell vdekjen nga COVID-19.
Sipas tij, e gjithë kjo situatë ndodh për shkak të dështimit të klasës politike 30-vjeëare që ka dështuar edhe me politikat e saj shëndetësore.
“Kemi dëgjuar çdo histori të mundshme. Kemi mësuar nga një telefonatë e vetme për humbjen e njerëzve të dashur, miqve dhe të njohurve tanë, kemi mësuar se disa prej tyre fillimisht u zgjuan duke u ndjerë mirë, pastaj gradualisht u sëmurën, rezultuan pozitiv me Covid-19 dhe si qindra të tjerë, brenda javësh humbën jetën.
Pavarësisht pamjes së zymtë, sfida e vërtetë është nëse ajo çfarë dimë rreth këtij virusi është e vërtetë apo jo. Nuk po luftojmë vetëm mbi opinionet ndaj një fakti dhe ende nuk e dimë nëse fakti është me të vërtetë një fakt. Jemi në mëdyshje nëse mjekësia po na thotë të vërtetën. Jemi në mëdyshje nëse qeveria po thotë të vërtetën. Jemi në mëdyshje mbi atë që po ndodh, që shfaqet, që publikohet dhe mbi të gjitha që po shqetëson pamasë qytetarët”, u shpreh Valteri.
Më tej ai foli edhe për dyshimet e ngritura për Covid ku theksoi se “Ky dyshim, i shoqëruar me masat anti-Covid të kërkuara për të luftuar këtë pandemi, na ka bërë të ndihemi më të vetmuar se kurrë.
Nuk dëshiroj të kontribuoj në pesimizëm, por sistemi kriminal 30-vjeçar, na ka vënë sot përpara dy zgjedhjeve: ose të mbyllemi dhe të falimentojmë ose të vdesim nga Covidi, pasi nuk ka asnjë mundësi tjetër. Po e theksoj këtë fakt, mbi të gjitha, sepse ka akoma shumë imbecilë mesh nesh që mendojnë se kjo klasë politike, 30-vjeçare, mund të sjellë ende ndonjë gjë të mirë”./Bl.Ba/Fjala.al
