Policia greke, ka rënë në gjurmët e autorëve që mbajtën dhe shantazhuan një shtetas shqiptar, 23-vjeçar.
I riu u rrëmbye shkurtin e kaluar në qendrën Selanikut dhe për më shumë se 24 orë u mbajt në një makinë derisa të afërmit e tij paguan para për ta liruar.
Autorët e krimit kërkuan fillimisht 2500 euro, por më pas ranë dakord për të marrë 1000 euro dhe pasi morën paratë ata e lanë të lirë 23-vjeçarin.
Sipas policisë si autorë të përfshirë në këtë ngjarje, u identifikuan tre bashkatdhetarë të 23-vjeçarit dhe dy vajza greke që morën përsipër të merrnin paratë.
Ndërkohë Departamenti i Krimeve Kundër Jetës, tha se arsyeja e kësaj ngjarje dyshohet se kanë qenë mosmarrëveshjet financiare që autorët kishin me viktimën.
Sakaq mediat e huaja shkruajnë se çështja do të paraqitet në Prokurorinë e Selanikut dhe më pas pritet të lëshohen urdhër-arrestet.
