Liga e Evropës ka vijuar të enjten me ndeshjet e 4-ta në grupe dhe, duke nisur nga ora 21:05, janë zhvilluar 11 ndeshjet e mbetura të 8 prej grupeve, duke dhuruar 31 gola të shënuar, afro 2.8 gola për ndeshje.
Në takimin e vetëm të grupit A që u zhvillua në atë orar, Roma ka mposhtur Klujzhin 2-0, duke u shkëputur në krye të renditjes, tanimë në kuotën e 10 pikëve dhe duke e siguruar që tani vendin në turin tjetër, atë të 32-shes.
Edhe në grupin B, në takimin tjetër të luajtur më vonë, Rapidi i Vjenës ka mundur 3-1 Dandokun, duke mbajtur gjallë shpresën për të vazhduar aventurën kontinentale, teksa është me pikë të barabarta, 6, me Molden, kur kanë mbetur edhe dy ndeshje për t’u luajtur.
Në grupin C, Bajer Leverkuseni dhe Sllavia e Pragës korrën fitore, përkatësisht në fushën e vet, 4-1 ndaj Hapoel Biir Shevas, dhe 3-1 në fushë të huaj, ndaj Nisës.
Ato ndajnë së bashku kreun e renditjes, me nga 9 pikë secila, 6 më tepër sesa dy skuadrat e tjera të grupit.
Në grupin D, Leh Poznani është mundur 1-2 në Belgjikë përballë vendasve të Standardit të Liezhit, por të dyja skuadrat kanë mbetur prapa në betejën për një vend në turin tjetër. Ndërsa Benfika dhe Gllasgou Rejnxhërs kanë shënuar nga 2 gola dhe kanë ndarë nga një pikë secila.
Çka nënkupton se portugezët dhe skocezët ndajnë edhe kreun e renditjes, me nga 8 pikë. Në grupin E, PSV-ja e Eind’hovenit ka korrur fitoren e dytë, duke mundur 3-2 në Holandë PAOK-un e Selanikut, ashtu sikundër edhe Granada ka fituar 2-1 në shtëpi ndaj Omonias së Nikozisë dhe spanjollët kryesojnë renditjen me 10 pikë, 4 më tepër sesa holandezët më tepër, ndërsa helenët janë një pikë prapa.
Dhe, së fundmi, në grupin F, AZ Alkma’ari dhe Real Sociedadi janë ndarë me rrjeta të paprekura në Holandë, ndërsa Napoli fitoi me përmbysje 2-0 në shtëpi ndaj Rijekës, çka nënkupton se italianët kryesojnë me 9 pikë, të ndjekur nga holandezët, dhe spanjollët kanë nga 7 pikë secila pas 4 ndeshjesh./Bl.Ba/Fjala.al
