Klodian Kola, 27-vjeçari i cili akuzohet për vrasjen pa dashje të shokut të tij, Elidon Basha, ka mohuar akuzat. Në dëshminë tij para uniformave blu, Kola ka deklaruar se nuk e ka qëlluar ai Elidon Bashën, duke hedhur pretendime se viktima mund të jetë qëlluar nga një person i tretë.
Ngjarja e rëndë ndodhi mbrëmjen e djeshme në Bulqizë, ndërsa sipas policisë, Elidon Basha u qëllua aksidentalisht nga shoku i tij, Klodian Kola, ndërsa kishin dalë të dy për gjueti.
Viktima mori një plumb në krah, ndërsa ndërroi jetë rrugës për në Spitalin e Traumës në Tiranë.
Pasi policia e Bulqizës tha më herët se dyshohet që Elidon Basha të jetë qëlluar me armë gjahu nga Klodian Kola, ky i fundit ka rrëfyer në polici se dy miqtë janë qëlluar nga persona të tjerë. Një dëshmi e papritur nga ana e 27-vjeçarit Kola, i cili në këtë mënyrë mohon që krimin ta ketë kryer ai.
Ndërkohë, sipas burimeve, fillimisht 22-vjeçarit të plagosur i janë dashur disa orë për të shkuar nga Spitali i Bulqizës, tek ai i Peshkopisë dhe më pas për t’u transportuar drejt Tiranës te Truma, por ka humbur jetën rrugës për shkak të gjakderdhjes së shumtë.
Mësohet se Elidon Basha është paraqitur në spitalin e Bulqizës rreth orës 23:00, ku ka marrë ndihmën e parë, por duke qenë se në këtë spital nuk ka kirurg, ai është nisur drejt Peshkopisë.
Gjendja shëndetësore e të riut është përkeqësuar dhe nga Spitali i Peshkopisë është nisur rreth orës 02:00 drejt Tiranës për mjekim më të specializuar, por fatkeqësisht ka ndërruar jetë rrugës./Bl.Ba/Fjala.al
