Vajzat kuqe blu mposhtin Apoloninë 2-0 në Shkodër, shkëputen në krye. Kampionati Kombëtar i Futbollit për Femra ka mbyllur të dielën javën e tij të 4-t, me dy takimet e zhvilluara pasdreke dhe që kanë dhuruar dy tablo të kundërta. Në atë që ishte padyshim përballja më e spikatur e javës dhe padyshim dueli kryesor për titullin këtë sezon, Vllaznia ka mposhtur me dy gola Apoloninë.
Takimi i zhvilluar në Stadiumin “Loro Boriçi” të Shkodrës është vendosur në favor të shkodraneve me dy gola në pjesën e parë. Megi Doçi ka thyer qëndresën e fierakeve me një goditje të lirë të ekzekutuar saktësisht pas një gjysmë ore lojë.
Vetëm 5 minuta më pas, Doçi dyfishon epërsinë e vajzave kuqeblu. Me këtë epërsi dygolëshe të vendaseve do të mbyllet 45 minutat e para, ndërsa ato të dytat nuk do të sjellin gola të tjerë dhe Vllaznia mposht Apoloninë 2-0 dhe shkëputet e vetme në krye të renditjes me pikë të plota 12, 3 më tepër sesa 4 skuadrat që e ndjekin, Tirana AS, fieraket, FK Tirana dhe Juban Danja.
Në takimin tjetër të së dielës, Kinostudio fitoi në fushën e Bilisht Sportit me rezultatin e thellë 17-0, çka nxjerr në pah edhe disnivelin në topkëmbën e vajzave.
