Zëvendës-kryetari i Bashkisë së Elbasanit, Ervin Saraçi ka humbur jetën në moshën 37 vjeçare.
Pak ditë më parë ai pësoi një goditje celebrale, teksa ishte ne palestër. Saraçi u nis më pas me urgjencë në spital. Në Tiranë ai iu nënshtrua një operacioni të gjatë e të rëndë, por fatkeqësisht nuk ia doli dot.
Pas operacionit të vështirë pati pak shpresë, teksa 37 vjeçari u raportua në gjendje të qendrueshme, por sot mësohet lajmi i trishtë, se nuk e fitoi dot betejën me jetën.
Të gjithë ata që e kanë njohur Ervinin do ta mbajnë mend si një djalë brilant, të qeshur dhe pozitiv. Një person i angazhuar pas aktiviteteve fizike, ai ishte një ndër anëtarët e shoqatës së Alpinizmit në Elbasan. Gati çdo fundjavë merrte pjesë në veprimtaritë e shoqatës , duke ngjitur disa nga malet dhe kodrat me të larta në vend, ndërsa pasditeve shkonte në palestër.
Ervin Saraçi kishte mbaruar studimet e larta për gjuhën Frenge në Elbasan, më pas ato Master në Shkencat politike në Belgjikë .
Në vitin 2006-2007 punoi si mësues i gjuhës Frenge në Shkollën e Mesme të Përgjithshme, Peqin. Në shtator të vitit 2011 -2013 iu besua drejtimi i kabinetit të Kryetarit të bashkisë Elbasan. Në vitin 2013-2015 u emërua drejtor i drejtorisë së Kujdesit Social po në bashkinë Elbasan.
Vitet e fundit ai mbajti postin e nënkryetarit të bashkisë së Elbasanit.
Ai ishte i martuar dhe babai i një djali 9-vjeçar.
Pa.Va/Fjala.al
