Një ditë pas nisjes së vaksinimit të qytetarëve në Britani, FDA publikoi raportin për vaksinën Pfizer-BioNTech.
Sipas këtij raporti vaksina me dy doza siguron përfitime që pas injeksionit të parë duke ulur rrezikun e marrjes së Covid-19. Ajo ka një efektshmëri prej 95% pas dozës së dytë e cila bëhet tre javë më vonë.
Në raportin përmbledhës të lëshuar nga FDA, ditën e martë, zbulohet se nga rezultatet e provave klinike të vaksinës Pfizer-BioNTech dy pjesëmarrës në studim humbën jetën. Dy marrësit e vaksinës, njëri prej tyre 55-vjeç pësoi arrest kardiak 62 ditë pas vaksinimit dhe tre ditë më vonë ai ndërroi jetë, ndërsa marrësi i dytë i vaksinës vdiq nga arterioskleroza tre ditë pas vaksinimit. Sipas raportit njëri prej tyre ishte imunokompromentuar, apo siç njihen ndryshe kategoria më e rrezikuar.
Dokumentet janë bërë publike para takimit i cili pritet të mbahet nesër (të enjten), me ekspertët e jashtëm të cilët do të debatojnë nëse duhet të jepet autorizimi i urgjencës për vaksinën.
Në raportin e saj, FDA thotë se të dhënat të cilat ata kanë paraqitur plotësojnë kriteret për autorizimin e përdorimit emergjent, por sipas të njëjtit raport thuhet se vaksina nuk është mjaftueshëm e sigurt për përdorim për grupin me imunitet të dobët, gratë shtatzëna dhe fëmijët nën moshën 16-vjeç./r.g/fjala.al
