Ministri i Brendshëm Sandër Lleshaj ka reaguar lidhur me ngjarjen e rëndë të ndodhur një ditë më parë në kryeqytet ku një 25-vjeçar humbi jetën pasi u qëllua me armë zjarri nga një efektiv policie.
Përmes një postimi në rrjetet sociale Lleshaj teksa shpreh ngushëllimet për familjen e të riut thekson se vetëm e vërteta është ngushëllimi i tyre më i madh.
“Ka shumë arsye se përse e ndjej fort se çfarë do të thotë humbja e Klodian Rashës për prindërit dhe familjarët e tij. Në këto çaste të hidhërimit të madh, u shpreh atyre ngushëllimet e mia më të thella për këtë humbje tragjike.
Në të njëjtën kohë, shpreh besimin tim të plotë se organet ligjore përgjegjëse do të finalizojnë shpejt, saktë, drejt dhe jashtë çdo ndikimi hetimet për vrasjen e Klodian Rashës.
Kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët.
Sot të gjithë kanë nevojë për qartësimin e plotë dhe shterues të rrethanave që sollën këtë ngjarje tragjike dhe autoritetet përgjegjëse ligjore duhet të përmbyllin sa më shpejt detyrën e tyre në shërbim të së vërtetës dhe të drejtësisë”, shkruan Lleshaj./Bl.Ba/Fjala.al
