Greqia do të ndërmarrë disa masa lehtësuese përgjatë periudhës së Krishtlindjeve, deri në datën 7 janar.
Ka qenë zëdhënësi i qeverisë greke ai që i ka bërë me dijeni masat në fjalë, teksa ndodhej në një konferencë më ministrin e Zhvillimit. Kështu nga e hëna do të hapen floktoret, libraritë dhe shërbimet teknike të automjeteve.
Ndërkohë ditën e Krishtlindjeve do të hapen kishat dhe ditën e Ujit të Bekuar, pra më 6 janar kishat e vogla dhe 25 mitropolite.
Po kështu, ora policore nga 21.00-5.00 ka ndryshuar në 22:00 – 5:00. Gjithashtu do të çelin dyert dyqanet e pakicës, por vetëm duke i blerë në mënyrë elektronike mallrat dhe duke e marrë produktin jashtë derës së dyqanit.
Ndryshon, gjithashtu, afati i karantinës për vizitorët nga jashtë vendit, për festat. Nga 10 ditë, karantina e detyruar do të jetë 3 ditë.
Zëdhënësi i qeverisë greke, Stelios Petsas, nuk ka theksuar nëse do të ketë përjashtime për të ardhurit nga vende me shifra të larta të infektuarish apo dallime të kufirit ajror me atë tokësor.
Nuk do të lejohet qarkullimi në zona apo qytete të ndryshme të Greqisë. Në taksi lejohet vetëm 1 pasagjer, përveç rasteve të prindit me fëmijë të mitur.
Përsa i përket festimit, do të lejohet në ambiente familjare, deri në 7 veta në çdo shtëpi./Bl.Ba/Fjala.al
