Një 37-vjeçar ka rënë në prangat e policisë ditën e sotme, i akuzuar për veprën penale “pornografi me të mitur në rrjetet sociale”.
Policia njofton se i dyshuari u arrestua në kuadër të finalizimit të operacionit “Zbulimi”, pas dy vitesh hetime.
Sipas policisë, dyshimet nisën pasi I.K, banues në Tiranë, kishte krijuar një profil në një rrjet social, me të dhëna të rreme.
Gjatë komunikimit me shtetas të huaj, nëpërmjet këtij rrjeti social, ky shtetas ka konsumuar elemente të kësaj vepre penale.
Në cilësinë e provës materiale, 37-vjeçarit iu sekuestrua një aparat celular. Ndërkohë po punohet për zbardhjen e plotë të këtij aktiviteti kriminal.
Policia ka apeluar prindërit që të ushtrojnë më shumë kontroll ndaj fëmijëve, gjatë përdorimit të rrjeteve sociale, si dhe të denoncojnë çdo rast abuzimi apo ngacmimi në internet./Bl.Ba/Fjala.al
