Një ditë pas protestës së pestë në Tiranë për Klodian Rashën, e cila u zhvillua dje, policia ka arrestuar katër persona dhe ka proceduar 46 të tjerë.
Në njoftimin e kësaj të hëne policia thekson se si pasojë e goditjes me gurë, lëndëve piroteknike dhe sendeve të forta në drejtim të punonjësve të policisë në shërbim, është dëmtuar një punonjës policie.
Të arrestuarit dhe të proceduarit janë nën akuzë për për kryerjen e veprave penale “Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës ” , ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike’’.
Sipas asaj që njofton policia, të dielën, “në Sheshin “Skenderbej” nisi një tubim i paligjshëm, i cili vazhdoi më pas në drejtim të godinës së Kryeministrisë, në afërsi të DVP Tiranë, në drejtim të “Bllokut” dhe disa më pas të ndarë me grupe janë kthyer sërish në Sheshin “Skëndërbej” dhe duke vazhduar më tej në rrugën e “Durrësit”, rrugën “Dritan Hoxha” dhe “Sheshit Shqiponja”, ku kanë dëmtuar gjatë rrugës së përshkruar kazanët e mbeturinave, sinjalistikën rrugore, reklamat e bashkisë dhe vend-stacionet e mjeteve të transportit publik.
Sakaq policia bën me dije se ndërkohë, vijon puna për identifikimin dhe kapjen e personave të tjerë të përfshirë në veprime të dhunshme ndaj policisë, pronës shtetërore dhe asaj private./Bl.Ba/Fjala.al
