Ka zgjatur rreth një orë vizita e tretë e kryeministrit Edi Rama mëngjesin e sotëm në familjen Rasha, e cila një javë më parë humbi djalin, Klodianin, pasi një efektiv policie qëlloi ndaj tij, pasi nuk iu bind urdhrit për të ndaluar.
Vizita e Ramës në familjen Rasha, vjen një ditë pasi qeveria shqiptare vendosi t’i japë një trajtim financiar mujor familjes së të ndjerit.
Një ditë më parë qeveria vendosi të caktojë masën e pensionit social për familjen Rasha, duke e argumentuar vendimin e shkruar, se Klodian Rasha “humbi jetën aksidentalisht”.
Lidhur me këtë përcaktim të Këshillit të Ministrave, babai i Klodian Rashës ka reaguar ashpër një ditë më parë, teksa ka thënë se “kjo është vrasje për së dyti”.
“Ajo nuk është version, ajo është devijim nga gjithçka dhe ajo është një vrasje për së dyti. Vrasje e dytë. Ajo është vrasje me paramendim. Dhe nuk ka asnjë lloj alibie”, – tha ai.
Sa i takon pensionit që iu akordua, “Abc news” thotë se ata do ta japin për bamirësi, pasi nuk kanë nevojë për para dhe gjatë gjithë jetës Qazim Rasha, babai i Klodianit nuk ia ka shtrirë dorën askujt, duke i rritur djemtë e tij me krenari.
Po ashtu, vëllezërit e të riut kanë thënë se “për dy ditë do ta marrin vesh nga prokuroria që nuk është vrasje aksidentale, por vrasje me dashje”.
25-vjeçari Rasha u vra mesnatën e datës 8 dhjetor nga një efektiv i Forcave Shqiponja, pasi nuk iu bind urdhrit për të ndaluar./Bl.Ba/Fjala.al
