Kryetari i Grupit Parlamentar të Partisë Socialiste Taulant Balla priti në një takim në Kryesinë e Kuvendit, kryetarin e Prezencës së OSBE-së në Shqipëri, Ambasadorin Vincenzo Del Monaco.
Përmes një postimi në rrjetin social facebook Balla deklaron se gjatë takimit ka vlerësuar se Presidenca shqiptare e Organizatës për Siguri dhe Bashkëpunim në Europë ishte një sukses për diplomacinë shqiptare.
Sipas Ballës, Shqipëria ka tashmë një kuadër ligjor të plotë për zgjedhjet e 25 Prillit, qoftë me përmbylljen e ligjeve që burojnë nga paketa e marrëveshjes së 5 Qershorit, qoftë me çertifikimin e ndryshimeve kushtetuese dhe në Kodin Zgjedhor nga Komisioni i Venezias.
Postimi i plotë i Taulant Ballës:
Zhvillova një takim miqësor dhe të frytshëm me Kryetarin e Prezencës së OSBE-së në Shqipëri, Ambasadorin Vincenzo Del Monaco.
Gjatë takimit vlerësova se Presidenca shqiptare e Organizatës për Siguri dhe Bashkëpunim në Evropë ishte një sukses për diplomacinë shqiptare. Vendi ynë nuk ka patur kurrë më parë një moment dhe peshë diplomatike si ky që arritëm gjatë kësaj Presidence, në mes të pandemisë por edhe me konflikte e kriza në vende apo rajone të ndryshme.
Tashmë kemi një kuadër ligjor të plotë për zgjedhjet e 25 Prillit, qoftë me përmbylljen e ligjeve që burojnë nga paketa e marrëveshjes së 5 Qershorit, qoftë me çertifikimin e ndryshimeve kushtetuese dhe në Kodin Zgjedhor nga Komisioni i Venezias.
Opinioni final vlerësoi se ndryshimet e mësipërme që i hapën rrugën listave të hapura, janë në përputhje me standardet e praktikat e mira zgjedhore.
Komisioni Venecias vlerësoi se Kuvendi?? është dhe mbetet legjitim për sa kohë ka gjithë kuorumet e nevojshme për çdo vendimarrje.
Mirënjohje Prezencës së OSBE-së në Shqipëri për bashkëpunimin e ngushtë me Kuvendin e Shqipërisë në disa projekte të rëndësishme.
