Shtohen zërat brenda kampit opozitar që PD dhe lideri i saj Lulzim Basha duhet të shpejtojnë procesin e përgatitjes së zgjedhjeve parlamentare të 25 prillit. Gjatë emisionit “HARD TALK NGA ROLAND QAFOKU”, kryetari i PAA Agron Duka deklaroi se nëse brenda javës Basha nuk shpall listën e kandidatëve opozita vë në pikëpyetje rezultatin e zgjedhjeve. Sipas Dukës, kjo vonesë do ketë kosto negative për opozitën. Duka tha se shpreson që Basha ta realizojë këtë.
-Ju dhe një pjesë tjetër e opozitës keni deklaruar se nëse Basha nuk bën publike emrat e kandidatëve për deputetë sa më shpejt, atëherë opozita nuk do ta ketë të lehtë në zgjedhjet e 25 prillit. Çfarë po ndodh?
-Këto ndryshimet Kushtetuese të papritura faktikisht, lanë të çditur edhe ata të PS sepse nuk mendohej që mund të kishte një kthesë të tillë dhe në një farë mënyre ndryshim të rregullave të lojës. Këto bënë që PD dhe gjithë opozita të jenë një hap pas sepse siç e dini ju e quajtën shkelje të marrëveshjes së 5 qershorit. Më vonë u prit në një farë mënyre edhe më institucionale vendimi i Venecias dhe të gjitha këto sollën vonesa. Mendoj që nuk jemi në limitet e kohës por duhet patjetër që të fillojmë.
-Kur do filloni?
-Unë kam këto indikacione që zoti Basha po mbaron brenda kësaj jave, të paktën i besoj bisedës direkte të bërë më të jo më larg sesa dje, brenda kësaj jave të shpallen koordinatorët ose drejtuesit e qarqeve dhe nga ana tjetër brenda kësaj jave të shpallen edhe kolaicionet me aleatët. Pyetjes suaj nëse nuk bëhet brenda kësaj jave apo brenda këtij muaji, natyrisht që do jemi shumë me vonesë dhe kjo është kosto negative për opozitën dhe mund të vërë në pikëpyetje të madhe përveç faktorëve të tjerë edhe fitoren e zgjedhjeve. Ndaj unë mendoj se është koha e domosdoshme që opozita të dalë përfundimisht me formulën si do garojë në zgjedhje.
