Angela Merkel e ka cilësuar vitin 2020 si vitin më të vështirë gjatë qeverisjes së saj 15-vjeçare, ndërsa cilësoi 2021 vitin e shpresës me fillimin e vaksinimit kundër COVID-19.
Në një intervistë emocionale të rrallë, kancelarja që udhëhoqi Gjermaninë dhe Bashkimin Evropian në krizën financiare të 2008, krizën e borxhit të Greqisë një vit më vonë dhe krizën e emigrantëve të 5 viteve më parë, dënoi rrymat e protestave që kundërshtuan izolimet e vendosura për të frenuar pandeminë.
“Më lejoni t’ju them diçka personale, në 9 muaj do të kemi zgjedhje parlamentare dhe unë nuk do të kandidoj sërish. Ndaj, sot, me gjasa është hera e fundit që unë mund të jap një fjalim të Vitit të Ri për ju. Besoj se nuk e ekzagjeroj kur them se në këto 15 vite, kurrë nuk e kemi parë vitin e vjetër kaq të rëndë dhe kurrë nuk e kemi pritur me kaq shpresë vitin e ri,” tha kancelarja gjermane Merkel.
Vlerësimi për zonjën Merkel për menaxhimin e duhur të valës së parë të pandemisë sipas këshillave shkencore u kthye në kritikë për atë që u konsiderua si dështim për të përballuar valën e dytë.
“Mund ta imagjinoj sa e hidhur është për personat që kanë mbajtur zi për të dashurit e tyre që kanë humbur jetën nga coronavirus apo që po luftojnë pasojat e kësaj sëmundjeje kur virusi ende vihet në diskutim dhe mohohet nga disa individë të pashpresë. Teoritë e konspiracionit nuk janë vetëm të rreme dhe të rrezikshme, por edhe cinike dhe mizore,” u shpreh Merkel.
Mandati i katërt dhe i fundit i Merkel është shënjuar nga pakënaqësia në radhët e konservatorëve, pas humbjeve në zgjedhjet rajonale, të cilat ju ngarkuan vendimit të kancelares për të mirëpritur një milionë azilkërkues në 2015.
